कपिलवस्तु : कालो बजारी गर्न स्टक गरी राखिएको रासायनिक मलको गोदाममा प्रहरीले छापा मारेको छ । वाणगंगा नगरपालिका- १० मेचकुरीस्थित स्थानीय सुलेमानको गोदाममा प्रहरीले छापा मारेर १ सय ७९ बोरा डिएपी मल बरामद गरेको हो ।
बरामद गरिएको मलखाद इलाका प्रहरी कार्यालयको प्रहरी टोलीको नियन्त्रणमा रहेको छ । कृषि सामाग्री संस्थान लिमिटेड र साल्ट ट्रेडिङ कर्पोरेशनबाट सरकारी अनुदानमा खरिद गरिएको रासायनिक मलखाद जिल्लाका केही सहकारी संस्थाहरूले कृषकलाई वितरण नगरी व्यापारीलाई बिक्री गर्ने गरेका छन् ।
व्यापारीलाई बिक्री गर्दा सहकारी संस्थाका सञ्चालकहरूले बढी मुल्य पाउने गर्छन् । सहकारीबाट खरिद गरिएको सहुलियत दरको मलखाद स्टक गरेर व्यापारीहरूले सरकारले तोकेको भन्दा करिब दोब्बर रेटमा पुनः कृषकलाई बिक्री गर्दै आएका छन् ।
सहकारी संस्थाले कृषकलाई बिक्री गर्नु भन्दा व्यापारीलाई बिक्री गर्दा बढी मुल्य पाउने भएका कारण कृषकका लागि आएको मलखाद व्यापारीलाई बिक्री गर्ने गरेको स्थानीय अवध राम थारुले बताए ।
प्रहरीले मेचकुरी गाउँका अन्य केही व्यवसायीहरूको गोदाममा पनि स्थानीय जनप्रतिनिधिकव रोहवरमा खानतलासी सुरु गरेको छ । जिल्लामा कही कतै रसायनिक मलको अवैध ढंगबाट स्टक गरिएको गोप्य खबर आएमा प्रहरीले तत्काल कारवाही अघि बढाइरहेको छ ।
कुनै पनि बहानामा कालो बजारी तथा अवैध कारोवार सञ्चालन गर्न नदिने र यस्ता कार्य गर्ने जो कोहीलाई पनि कानुन अनुसारको कारवाही प्रक्रिया अघि बढाउने प्रहरी उपरीक्षक सन्तोष आचार्यले बताए ।
यसै गरी केही दिनअघि सशस्त्र प्रहरीले छापा हानेर अवैध रुपमा घरमा लुकाई छिपाई राखेको अवस्थामा १ सय २४ बोला डिएपी रसायनिक मल बरामद गरेको थियो । सुराकीका आधारमा शुद्धोधन गाउँपालिका - १ अनहराटस्थित फुलचन्द्र यादवको घरमा राखिएको अवस्थामा सो मलखाद बरामद गरिएको सशस्त्र प्रहरी उपरीक्षक नेत्र केसीले जानकारी दिए।
प्रतिक्रिया दिनुहोस !
