झापा : चालु आर्थिक वर्ष २०८२/८३ को ६ महिनाको अवधिमा पूर्वी नाका काँकडभिट्टाबाट अलैंची, छुर्पीलगायत वस्तुको निर्यातमा वृद्धि भएको छ । साउनदेखि पुस मसान्तसम्मको ६ महिनामा ७ अर्ब १९ करोड ९५ लाख ४ हजार रुपैयाँ मूल्यबराबरको ३४ लाख ६१ हजार ३५० केजी अलैंची निर्यात भएको मेची भन्सार कार्यालयले जनाएको छ ।
गत आव २०८१/८२ को सोही अवधिको तुलनामा चालु आवमा अलैंचीको निर्यात ५८ प्रतिशतले वृद्धि भएको कार्यालयका सूचना अधिकारी ईश्वरकुमार हुमागाईंले बताए ।गत आवको साउनदेखि पुससम्म ४ अर्ब ५५ करोड ७० लाख ६९ हजार मूल्यबराबरको अलैंची पूर्वी नाकाबाट निर्यात भएको थियो । कुकुर र बिरालोको खानाका रूपमा तेस्रो मुलुक निर्यात हुँदै आएको छुर्पीको निर्यात चालु आवको ६ महिनाको अवधिमा गत आवको सोही अवधिको तुलनामा ६६.२ प्रतिशतले वृद्धि भएको हो ।
चालु आवको ६ महिनामा ७६ करोड ५ लाख ३ हजार रुपैयाँ मूल्यबराबरको ४ लाख ३२ हजार ४०५ केजी छुर्पी निर्यात भएको छ । गत आवको सोही अवधिमा ४५ करोड ७६ लाख ३४ हजार रुपैयाँ मूल्यबराबरको २ लाख ६६ हजार २४३ केजी छुर्पी निर्यात भएको भन्सारले जनाएको छ ।
भेनियर सिट र मुसुरो दालको निर्यातसमेत उच्च रहेको छ । चिया र प्लाइउडको निर्यात प्रगति भने गत आवको तुलनामा ऋणात्मक रहेको छ । चालु आव २०८२/८३ को छ महिनामा ५३ करोड ४ लाख ९६ हजारको भेनियर सिट र ९ करोड १२ लाख ८७ हजार रुपैयाँ मूल्यको मुसुरो दाल निर्यात भएको छ ।
गत आवको तुलनामा मुसुरो दाल ४८१ प्रतिशतले र भेनियर सिट १०९ प्रतिशतले निर्यातमा वृद्धि भएको छ । अर्धवार्षिक अवधिमा चियाको निर्यातमा २६.४ प्रतिशतले र प्लाइउडको निर्यातमा ४४.५ प्रतिशतले गिरावट आएको मेची भन्सारले जनाएको छ । चालु आवको छ महिनामा २ अर्ब १७ करोड ८७ लाख ५ हजार मूल्यबराबरको चिया र १ अर्ब ९ करोड ७४ लाख ३ हजार रुपैयाँ मूल्यबराबरको प्लाइउड निर्यात भएको छ । गत आवको सोही अवधिमा २ अर्ब ९५ करोड ९० लाख ३७ हजार रुपैयाँ मूल्यबराबरको चिया र १ अर्ब ९७ करोड ७६ लाख ४६ हजार मूल्यबराबरको प्लाइउड निर्यात भएको थियो ।
यसैगरी, चालु आव २०८२/८३ को पुससम्मको अर्धवार्षिक अवधिमा ३३ करोड ८९ लाख ३ हजारको अम्लिसो, ५० करोड १७ लाख ३२ हजारको अदुवा र सुठो, ११ करोड ३१ लाख ९१ हजारको काउली, बन्दाकोभी र ब्रोकाउली र ५ करोड ७४ लाख २७ हजार रुपैयाँ मूल्यबराबरको जडीबुटी निर्यात भएको भन्सारका सूचना अधिकारी हुमागाईंले जानकारी दिए ।
प्रतिक्रिया दिनुहोस !
