बर्दिबास : जंगली जीवजन्तुले बालीनाली खाएर हैरान बनाएपछि महोत्तरीको बर्दिबास क्षेत्रका किसानहरु व्यवसायिक बेसार खेतीमा जुटेका छन् । किसान बहुमुखी सहकारी (साझा संस्था) बर्दिबासले नगरमा व्यसायिक बेसार खेती बिस्तारका लागि अभियान चलाएको छ । सहकारी सञ्चालन समिति सदस्य डाकराज पोखरेलका अनुसार बेसार खेती गर्न बिजलपुरा, किसाननगर, हातिलेट, पशुपतिनगरलाई सूचीकृत गरेर खेती अभियान चलाइएको छ ।
सहकारीका अध्यक्ष भानुभक्त पोखरेलले पहिलो चरणमा कुल २५ बिघा क्षेत्रफलमा बेसार खेती गर्न योजना बनाइएको बताए । उनले भने, ‘किसानलाई बेसार खेतीमा प्रोत्साहन स्वरुप प्रतिकठ्ठा २ हजारका दरले एक वर्षका लागि निर्ब्याजी कर्जा उपलब्ध गराउँछौ ।’ उत्पादित बेसार सहकारीले खरिद गरेर प्रशोधन गरी बजारीकरण गर्ने योजना रहेको अध्यक्ष पोखरेलको भनाइ छ । ‘पाँच कठ्ठासम्म सहकारीले निर्ब्याजी कर्जा दिन्छ । किसानले जति उब्जाए पनि सहकारीले बेसार खरिद गरिदिन्छ । त्यसका लागि सहकारीको शेयर सदस्य हुनु पर्नेछ’, उनले भने।
अध्यक्ष पोखरेलका अनुसार सहकारीले १२ लाख रुपैयाँ बेसार खेतीमा लगानी गर्ने जनाएको छ । बर्दिबास नगरपालिकाले १५ लाख रुपैयाँ अनुदान स्वरुप सहकारीलाई उपलब्ध गराउने बताइएको छ । यहाँ बेसार गर्न समूह पनि गठन गरिएको छ । बर्दिबास नगरपालिका–१२ बिजलपुराका लागि विश्वनाथ महतो र वडा नम्बर–१३ का लागि मनिष समालको अध्यक्षतामा अलग–अलग पाँच-पाँच सदस्यीय समूह गठन गरिएको छ । महतोले नेतृत्व गरेको समूहको नाम बिजलपुरा किसान समूह र समालले जिम्मेवारी पाएको समूहको नाम महारानी कृषि समूह राखिएको छ ।
यता जंगली जनावर निलगाई, बँदेल, बाँदरले बालीनाली खाएर सखाप पार्ने गरेकाले त्यसको विकल्पमा बेसार खेती बिस्तार गर्न लागिएको सहकारीका अध्यक्ष पोखरेलले बताए । आउने दिनमा बेसारमा अनुदान उपलब्ध गराउन पहल भइइरहेको उनले जनाए । किसान जगजीवन महतोका अनुसार खेती फस्टायो भने कठ्ठामा ८ क्विन्टल बेसार उत्पादन हुन्छ । एक कठ्ठा बेसार खेती गर्न ८ हजार लागत हुन्छ भने आम्दानी २१ हजार आम्दानी हुने सहकारीले जनाएको छ । सहकारीविज्ञ सुदर्शन ढकालले कृषि सहकारीमा सबै किसानलाइ स्थानीय सरकारले जोड्न योजना बनाउनु पर्ने बताए ।
बेसारमा औषधीय गुण हुने भएकाले यो बाली निकै लाभदायक र फाइदाजनक रहेको किसान विश्वनाथ सिंहले बताए । अर्का किसान रामप्रमोद महतोले बेसार खेतीमा प्रावधिक, मलखाद्य र यान्त्रिक उपकरण स्थानीय सरकारले उपलब्ध गराउनु पर्ने माग गरे । पैर्व वडा सदस्य रामपुजन महतोले स्थानीयस्तरमा भएको सहकारीसँग सहकार्यको आवश्यकता रहेको बताए ।
निजामती कर्मचारी तथा किसान दिपेन्द्र महतोले बेसार खेती बिस्तारले जंगली जनावरको आतंकबाट छुटकारा मिल्ने विश्वास लिएको बताए । बर्दिबास नगरपालिकाको प्रमुख प्रशाकीय अधिकृत राममणि अधिकारीले कृषि सहकारी किसानको समृद्धिको आधार भएको बताए । उनले भने, ‘सहकारीको माध्यमबाट दूध उत्पादन र बेसार खेतीलाई व्यवस्थित गर्न लागेका छौ ।’ बर्दिबास नगरपालिका १३ नम्बरका वडा अध्यक्ष लक्ष्मण सिंहले आगामी बजेटमा किसानको माग सम्बोधन गर्न नीति, कार्यक्रम र बजेट बिनियोजन गर्ने बताए ।
प्रतिक्रिया दिनुहोस !
