रास्वपा सभापतिको उम्मेदवार बन्न ५१ हजार र केन्द्रीय सदस्यलाई २१ हजार दस्तुर

काठमाडौं : राष्ट्रिय स्वतन्त्र पार्टी (रास्वपा) को सभापतिको उम्मेदवार बन्न ५१ हजार दस्तुर तोकिएको छ । बुधबार पार्टी केन्द्रीय कार्यालय बालाजुमा बसेको केन्द्रीय समिति बैठकले पदाधिकारीलाई ४१ हजार र केन्द्रीय सदस्यलाई २१ हजार रूपैयाँ उम्मेदवारी शुल्क तोकेको हो ।

त्यस्तै, सहमहामन्त्री विपिन आचार्यको संयोजकत्वमा विधान संशोधन समिति गठन गरेको छ । जसमा प्रकाशचन्द्र परियार लगायत सदस्य छन् । रास्वपाको महाधिवेशनमा देशभरबाट २५ सय प्रतिनिधि सहभागी हुने भएका छन् ।  चितवनमा असार ७, ८ र ९ गतेसम्म हुने पहिलो महाधिवेशनमा ७७ वटै जिल्लाबाट २५ सय प्रतिनिधि सहभागी हुने आज आज बिहान बसेको केन्द्रीय समितिको बैठकले तय गरेको रास्वपाका नेता प्रकाशचन्द्र परियारले जानकारी दिएका छन् ।

बैठकमा महाधिवेशनको तयारीबारे छलफल भएको बताइएको छ । उनले ७७ वटै जिल्लामा समन्वयका लागि प्रतिनिधि तोकिने पनि जानकारी दिए । यस्तै जेठ २६ गते बागमतीको प्रदेश अधिवेशन, जेठ २७ गते कोशी, २८ गते मधेस, २९ गते गण्डकी प्रदेश ३० गते लुम्बिनी प्रदेश, ३१ गते कर्णाली प्रदेश र असार १ गते सुदूरपश्चिम प्रदेशको अधिवेशन हुने उनले जानकारी दिए । रास्वपाको जिल्ला अधिवेशन यसअघि नै भइसकेको छ ।

 राष्ट्रिय स्वतन्त्र पार्टी २०७९ सालको असार ७ गते घोषणा भएको थियो । निर्वाचन आयोगमा भने असार १७ गते दर्ता भएको थियो । स्थापनाकालदेखि रवि लामिछाने रास्वपाको सभापतिमा रहेका छन् । हाल बालेन्द्र शाह वरिष्ठ नेता, डा.स्वर्णिम वाग्ले उपसभापति, कविन्द्र बुर्लाकोटी महामन्त्री, भूपदेव शाह महामन्त्री, विपिनकुमार आचार्य सह–महामन्त्री, लिमा अधिकारी कोषाध्यक्ष, वसुमाया तामाङ्ग सह–कोषाध्यक्ष रहेका छन् । डीपी अर्याल सभामुख बनेपछि उपसभापति पदबाट हटेका हुन् ।