काठमाडौं : वालेन्द्र शाह नेतृत्वको सरकार गठन भएयता नेपाल भ्रमण गर्ने सबैभन्दा वरिष्ठ अमेरिकी अधिकारीका रूपमा रहेकी अमेरिकी उपविदेशमन्त्री सारा बी रोजर्स तीनदिने औपचारिक भ्रमण पूरा गरी मंगलबार स्वदेश फर्किएकी छन् ।
अमेरिकी विदेश मन्त्रालयकी सार्वजनिक कूटनीति तथा जनसम्पर्कसम्बन्धी उपविदेशमन्त्री रोजर्स मे २७ देखि जुन १० सम्मको भारत, नेपाल, उज्बेकिस्तान र तुर्कमेनिस्तानको क्षेत्रीय भ्रमणका क्रममा जेठ १६ गते काठमाडौं आइपुगेकी थिइन् ।
नेपालमा रहँदा उनले नेपाललाई स्वतन्त्र र सार्वभौम राष्ट्रका रूपमा सम्मान गर्दै यहाँको आर्थिक समृद्धि, राजनीतिक स्थिरता तथा सार्वभौमिकताको संरक्षणमा अमेरिकाको प्राथमिक चासो रहेको बताएकी छन् । उनले नेपालले आफ्ना राष्ट्रिय प्राथमिकताहरू स्वयं निर्धारण गर्ने अधिकारप्रति अमेरिका प्रतिबद्ध रहेको समेत उल्लेख गरिन् ।
भ्रमणका क्रममा उपविदेशमन्त्री रोजर्सले नेपाल सरकारका उच्च अधिकारीहरूसँग बेग्ला–बेग्लै भेटवार्ता गरेकी थिइन् । उनले परराष्ट्रमन्त्री शिशिर खनालसँग द्विपक्षीय सम्बन्ध, आर्थिक सहकार्य, लगानी, व्यापार तथा विकास साझेदारीका विषयमा छलफल गरिन् । परराष्ट्र मन्त्रालयका अनुसार दुवै पक्षले नेपाल–अमेरिका सम्बन्धलाई परम्परागत सहायताभन्दा माथि उठाएर अझ व्यावहारिक र परिणाममुखी बनाउने प्रतिबद्धता व्यक्त
गरेका छन् ।
त्यसैगरी, सञ्चार तथा सूचना प्रविधिमन्त्री विक्रम तिमिल्सिनासँगको भेटमा डिजिटल रूपान्तरण, कृत्रिम बुद्धिमत्ता, साइबर सुरक्षा, डिजिटल स्वतन्त्रता र नवप्रवर्तनका विषयमा केन्द्रित छलफल भएको थियो । अमेरिकी पक्षले नेपालको डिजिटल पूर्वाधार र युवा उद्यमीहरूलाई प्रोत्साहन गर्ने कार्यक्रममा सहकार्य गर्न चासो देखाएको छ ।
रोजर्सको नेपाल भ्रमणको प्रमुख आकर्षण काठमाडौंमा आयोजित ‘नेपाल्स एसेन्ट समिट २०२६’ मा उनको सहभागिता रह्यो । अमेरिकी दूतावास, नेपाल पर्यटन बोर्ड र सेभेन समिट ट्रेक्सको सहकार्यमा आयोजित उक्त सम्मेलनमा १ हजार ४ सयभन्दा बढीको उपस्थिति थियो । सम्मेलनमा पर्वतारोहण, साहसिक पर्यटन, सुरक्षा मापदण्ड र हिमाली पर्यटनको भविष्यबारे सघन छलफल भएको थियो ।
काठमाडौंस्थित अमेरिकी दूतावासका सार्वजनिक मामिला प्रमुख माइक हार्करले गत जेठ ६ गते सफलतापूर्वक सगरमाथाको आरोहण गरी विश्वकै सर्वोच्च शिखर चढ्ने पहिलो कार्यरत अमेरिकी कूटनीतिज्ञको कीर्तिमान बनाएलगत्तै उनी काठमाडौं उत्रेकी थिइन् । अमेरिकाको स्वतन्त्रताको २५०औं वार्षिकोत्सव ‘फ्रिडम २५०’ को अवसरमा भएको उक्त सफल आरोहणको सम्मानमा आयोजित विशेष समारोह र एसेन्ट समिट दुवैमा उपविदेशमन्त्री रोजर्स प्रमुख अतिथिका रूपमा सहभागी भइन् ।
गएको गत चैत १३ गते वालेन्द्र शाहको नेतृत्वमा नयाँ सरकार गठन भएयता काठमाडौंमा अमेरिकी उच्च अधिकारीहरूको लगातार आगमन भइरहेको छ । यसअघि गत वैशाख ७ गते दक्षिण तथा मध्यएसिया मामिला हेर्ने अमेरिकी सहायक विदेशमन्त्री समीर पल कपुर र त्यसको एक सातापछि वैशाख १९ गते अमेरिकी राष्ट्रपति डोनाल्ड ट्रम्पका विशेष दूत सर्जियो गोरले नेपालको भ्रमण गरिसकेका छन् ।
अघिल्ला दुई उच्च अधिकारीहरूले प्रधानमन्त्री शाहसँग भेट गर्ने अवसर नपाए पनि उपविदेशमन्त्री रोजर्स रोजर्सको यो भ्रमणले नेपाल–अमेरिका सम्बन्धलाई नयाँ गति दिएको छ । पछिल्ला महिनाहरूमा अमेरिकी उच्च अधिकारीहरूको लगातारको नेपाल भ्रमणले नेपालप्रतिको अमेरिकी चासो निकै बढेको संकेत गरेको छ ।
प्रतिक्रिया दिनुहोस !
