वीरगन्ज : वीरगन्ज महानगरपालिका–२६ चक्रदहस्थित निर्माणाधीन पुल नजिकैको खाल्डोको पानीमा डुबेको अवस्थामा दुई बालिका मृत फेला परेका छन् । वडा नम्बर २६ सुगौलीका प्रभु ठाकुरकी छोरीहरु ५ वर्षीया पुच्की ठाकुर र ३ वर्षीया घघरी ठाकुर एउटै खाल्डोको पानीमा डुबेको अवस्थामा मंगलबार बिहान मृत फेला परेका हुन् ।
प्रहरीका अनुसार, सोमबार ती बालिका आफना हजुरबुबवा किशोरी ठाकुरसगँ खेतमा गएका थिए । सोमबार बिहान ११ बजेतिर खेतमा गएका बेला हजुरबुबा किशोरीले ती दुवै बालिकालाई तिमीहरु यहिँ बस म तिमीहरुको हजुरआमालाई बोलाएर ल्याउँछु भनेर खेतमै छाडेर गएका थिए । केहि बेरपछि उनी फर्किएर खेतमा आउँदा ती दुवै बालिका त्यहाँ थिएनन् ।
त्यसपछि अभिभावकहरुले गाउँघर र आफन्तकोमा खोजतलास गर्दा नभेटिएपछि ती दुवै बालिकाकी आमा अन्तिमा देवीले खोजतलासका लागि सोमबार नै राति ईलाका प्रहरी कार्यालय सुगौलीमा जानकारी गराएकी दिएकी थिइन् ।
त्यसपछि खोजीमा जुटेको प्रहरीले खोजतलासकै क्रममा मंगलबार बिहान ६ बजेतिर वडा नम्बर २६ मै पर्ने चक्रदहस्थित निर्माणाधिन पुल नजिक रहेको खाल्डोमा जमेको पानी डुबेर दुवै बालिका मृत अवस्थामा भेटिएको पर्साका प्रहरी नायब उपरीक्षक चक्रबहादुर मल्लले जानकारी दिए । दुवै बालिकाको शव पोष्टमार्टमका लागि नारायणी अस्पतालमा पठाइएको र घटनाबारे अनुसन्धान अघि बढाइएको प्रहरी नायब उपरीक्षक मल्लले बताए ।
प्रतिक्रिया दिनुहोस !
