देवानगन्ज घटनापछि सीमामा परिचयपत्र अनिवार्य, ‘हाइ अलर्ट’ मा सुरक्षा निकाय
साउन १३, २०८३ बुधबार १४:३२:६
विराटनगर : सुनसरीको देवानगन्ज–३ कप्तानगन्जमा भएको घटनापछि कोशी प्रदेशका भारतसँग सीमा जोडिएका जिल्लाका सबै प्रमुख नाकामा सुरक्षा व्यवस्था थप कडा पारिएको छ । सम्भावित घुसपैठ, धार्मिक संगठनको आवरणमा नेपाल प्रवेश गर्ने समूह,हातहतियार तथा लागुऔषधको अवैध ओसारपसार रोक्न सुरक्षा निकायमार्फत सीमा क्षेत्रमा विशेष निगरानी बढाइएको हो ।
सुरक्षा निकायका अनुसार अब भारतबाट नेपाल प्रवेश गर्ने प्रत्येक व्यक्तिले अनिवार्य रूपमा परिचयपत्र (आईडी कार्ड) देखाउनुपर्नेछ । वैध परिचयपत्र भएका व्यक्तिलाई मात्रै नेपाल प्रवेश गर्न दिइने व्यवस्था लागू गरिएको छ ।
देवानगन्ज घटनापछि उत्पन्न सुरक्षा अवस्था, सामाजिक सद्भाव र शान्ति व्यवस्थाका बारेमा समीक्षा गर्न कोशी प्रदेश सरकारले बुधबार विराटनगरस्थित आन्तरिक मामिला तथा कानुन मन्त्रालयमा सर्वपक्षीय बैठक आयोजना गरेको थियो । बैठकमा कोशी प्रदेशका प्रहरी प्रमुख डीआईजी शेखर खनालले सीमा क्षेत्रमा सुरक्षा सतर्कता उल्लेखनीय रूपमा बढाइएको जानकारी दिए ।
उनका अनुसार घटनाको आडमा बाह्य तत्वको घुसपैठ,अवैध हातहतियारको कारोबार तथा लागुऔषध तस्करी बढ्न सक्ने सम्भावनालाई ध्यानमा राखेर सीमा नाकामा अतिरिक्त सुरक्षा जनशक्ति परिचालन गरिएको छ । ‘सुनसरीमा मधेश प्रदेशबाट समेत थप प्रहरी खटाइएको छ । कोशी प्रदेशका पहाडी तथा अन्य जिल्लाबाट पनि सुरक्षाकर्मी झिकाएर सुनसरीमा परिचालन गरिएको छ,’उनले भने ।
बैठकमा सहभागी मोरङका प्रमुख जिल्ला अधिकारी युवराज कटेलले धार्मिक संघ संगठनको नाममा केही समूह भारतबाट नेपाल प्रवेश गर्न सक्ने सूचना प्राप्त भएकाले मोरङका सीमा नाकामा निगरानी थप कडा बनाइएको बताए । उनले आईडी कार्डबिना नेपाल प्रवेश गर्न नदिइने र शंकास्पद गतिविधिमाथि विशेष निगरानी राखिएको स्पष्ट पारे ।‘देवानगन्ज घटनापछि सीमा क्षेत्रमा सुरक्षा निकायले उच्च सतर्कता अपनाएका छन् । परिचयपत्र नभएका व्यक्तिलाई नेपाल प्रवेश गर्न रोक लगाइएको छ,’प्रजिअ कटेलले भने ।
गत आइतबार राति सुनसरीको देवानगन्ज–३ कप्तानगन्जमा दुई पक्षबीच भएको झडप नियन्त्रणमा लिन प्रहरीले गोली चलाउँदा २५ वर्षीय ओमप्रकाश मेहताको मृत्यु भएको थियो । घटनामा गोली लागेर नौ जना घाइते भएका थिए भने सुरक्षाकर्मीसहित घाइतेको संख्या २२ भन्दा बढी पुगेको छ ।
घटनापछि सुनसरीका विभिन्न क्षेत्रमा विरोध प्रदर्शन,आगजनी,तोडफोड,आक्रमण,लुटपाट तथा सवारीसाधन सञ्चालनमा अवरोधका घटना भएका छन् । त्यसपछि प्रशासन र सुरक्षा निकायले सुनसरीसहित सीमा क्षेत्र र संवेदनशील स्थानमा सुरक्षा व्यवस्था थप मजबुत बनाएका छन् ।
सर्वपक्षीय बैठकमा सहभागी राजनीतिक दल,प्रशासन, सुरक्षा निकाय तथा नागरिक समाजका प्रतिनिधिले शान्ति,सुरक्षा र सामाजिक सद्भाव कायम राख्न सबै पक्षलाई संयमता अपनाउन, अफवाह नफैलाउन तथा उत्तेजनात्मक गतिविधिबाट टाढा रहन आग्रह गरेका छन् ।
प्रतिक्रिया दिनुहोस !
