उद्योगी प्रकाश मुन्दडाको घर र अफिसमा साढे पाँच घण्टा प्रहरीको छापा
साउन १८, २०८३ सोमबार ११:४४:५६
विराटनगर : विराटनगरका प्रतिष्ठित उद्योगी प्रकाश मुन्दडाको विराटनगरस्थित निवास र कार्यालयमा सोमबार बिहान प्रहरीले छापा हानेको छ । मुन्दडा मोरङ उद्योग व्यापार संघका पूर्वअध्यक्ष तथा नेपाल उद्योग परिसंघ कोशीका उपाध्यक्ष हुन् । उनको घर तथा कार्यालयमा प्रहरीले सञ्चालन गरेको सघन खानतलासीबाट केही फेला परेन । करिब साढे पाँच घण्टासम्म चलेको ‘मेगा अपरेसन’पछि प्रहरी टोली रित्तो हात फर्किएको छ ।
बिहान करिब ४ बजेदेखि विराटनगर महानगरपालिका–७ स्थित मुन्दडाको घर र कार्यालयमा ठूलो संख्यामा प्रहरी परिचालन गरी खानतलासी थालिएको थियो । मोरङ प्रहरी प्रमुख एसपी कवित कटवालका अनुसार बिहान करिब ९:३० बजेसम्म चलेको अपरेसनका क्रममा घरदेखि कार्यालयसम्मका सबै क्षेत्रको सूक्ष्म रूपमा जाँच गरियो । खानतलासीका बेला घर आसपासको आवतजावत केही समयका लागि रोकिएको थियो । जिल्ला प्रशासन कार्यालय मोरङ र गोल्छा मोडतर्फ जाने सडकमा समेत केही समय सवारी सञ्चालन प्रभावित भएको थियो। ।
अपरेसनमा जिल्ला प्रहरी कार्यालय मोरङ, वडा प्रहरी कार्यालय विराटनगर र इलाका प्रहरी कार्यालय रानीबाट ठूलो संख्यामा प्रहरी परिचालन गरिएको थियो । एक दर्जनभन्दा बढी प्रहरीका सवारीसाधन प्रयोग गरिएको उक्त अपरेसनको नेतृत्व मोरङ प्रहरी प्रमुख एसपी कवित कटवालले गरेका थिए ।
एसपी कटवालका अनुसार अनुसार विशेष सूचनाका आधारमा मुन्दडाले अवैध रूपमा ठूलो परिमाणमा नगद लुकाएर राखेको आशंकामा खानतलासी गरिएको थियो । मुन्दडाको नाम विगतदेखि नै अवैध हुण्डी कारोबारसँग जोडिँदै आएको चर्चा भए पनि उनीमाथि यसअघि औपचारिक अनुसन्धान भने भएको थिएन । यसपटक प्राप्त सूचनाकै आधारमा प्रहरी अपरेसन अघि बढाइएको हो ।
उद्योग तथा व्यापार क्षेत्रका केही व्यवसायीले मुन्दडाको देवनरा ग्रुपको चाँदी कारोबारसँग सम्बन्धित विषय पनि अनुसन्धानको दायरामा पर्न सक्ने अनुमान गरेका थिए । प्रहरी स्रोतका अनुसार कुनै उद्योगी व्यवसायीकै विशेष सूचनाका आधारमा छापा मारिएको थियो । एसपी कटवालले लामो समयसम्म खोजतलास गर्दा पनि कुनै नगद,कागजात वा अन्य सामग्री बरामद नभएको बताए । उनले भने, ‘विशेष सूचनाका आधारमा घर र कार्यालयमा विस्तृत खानतलासी गरेका थियौं । तर कुनै पनि प्रमाण वा सामग्री फेला परेन । त्यसपछि प्रहरी टोली फर्किएको हो । कहिलेकाहीँ प्राप्त सूचना पूर्ण रूपमा सही नहुन पनि सक्छ ।’
प्रहरीको यति ठूलो परिचालनपछि पनि कुनै उपलब्धि हासिल हुन नसक्दा विराटनगरको उद्योग तथा व्यापारिक क्षेत्रमा यस घटनाले व्यापक चर्चा पाएको छ । प्राप्त सूचनाको विश्वसनीयता, अनुसन्धानको आधार र यति ठूलो स्तरको अपरेसनको औचित्यमाथि समेत प्रश्न उठ्न थालेको छ । यसैबीच, उद्योगी व्यवसायी वृत्तमा मुन्दडा पछिल्लो समय राष्ट्रिय स्वतन्त्र पार्टी (रास्वपा)सँग निकट भएको चर्चा पनि भइरहेको छ । २०८२ फागुन २१ गते सम्पन्न प्रतिनिधिसभा निर्वाचनमा रास्वपाका उम्मेदवारलाई आर्थिक सहयोग गरेको चर्चा भए पनि त्यसको आधिकारिक पुष्टि भएको छैन ।
मुन्दडाको नाम यसअघिदेखि नै कर छली, हुण्डी कारोबार तथा विभिन्न आर्थिक गतिविधिसँग जोडिएर सार्वजनिक चर्चामा आउने गरेको थियो । यद्यपि,आरोपहरूको कुनै आधिकारिक पुष्टि भएको छैन । यस विषयमा प्रतिक्रिया लिन बारम्बार सम्पर्क गर्न खोज्दा मुन्दडासँग सम्पर्क हुन सकेन । उनले फोन उठाएनन् ।
प्रतिक्रिया दिनुहोस !
