सिरहा : सिरहाको लहान नगरपालिकाले स्वच्छता अभियानमार्फत घरघरमा शौचालय बनाउन थालेको छ । यो नगरपालिका २०७४ सालमै खुला दिशामुक्त क्षेत्र घोषणा भएको थियो । तर, घोषणा भएको १० वर्ष पुग्न लाग्दा पनि अझै ४२०१ घरधुरीमा शौचालय नरहेको देखिएको छ ।
८ महिनाअघि नगरपालिकाले स्वच्छता अभियानअन्तर्गत सर्भे गरेको थियो । त्यसमा नगरको २३ हजार १९० घरधुरीमध्ये ४ हजार २०१ मा शौचालय नरहेको पाइएको छ । १५ हजार ९१२ घरधुरीमा कार्यशिल र ३४ सय ४४ घरधुरीमा शौचालय भए पनि सक्रिय रुपले प्रयोग नगरिरहेको पाइएको हो ।
सबैभन्दा बढी दलित, मुसहर परिवारसँग आफ्नै शौचालय नभएको पाइएको छ । केही सम्पन्न घरपरिवारमा शौचालय छैन । यिनै परिवारलाई समेटेर लहान नगरपालिकालाई खुला दिसामुक्त र पूर्ण सरसफाइयुक्त बनाउन विशेष रणनीतिसहित अभियान सुरु गरिएको छ ।
मेयर महेश चौधरीका अनुसार दलित जनकल्याण युवा क्लबसँग सहकार्य गर्दै मुसहर बस्तीहरूमा आधुनिक सामुदायिक शौचालय निर्माण कार्यलाई तीव्रता दिएको छ । हालसम्म विभिन्न सुकुमवासी बस्तीमा ६ वटा सुविधा सम्पन्न सामुदायिक शौचालय निर्माण भई सञ्चालनमा आइसकेको र अन्य क्षेत्रमा विस्तार हुँदै जाने उनले बताए ।
लहानलाई शतप्रतिशत शौचालययुक्त नगर बनाउने प्रतिबद्धता व्यक्त गर्दै उनले भने, ‘जग्गा नभएर शौचालय बनाउन नसकेका विपन्न मुसहर परिवारका लागि ६ वटा आधुनिक सामुदायिक शौचालय बनाइसकेका छौँ र अन्य ठाउँमा बनाउने क्रम जारी छ । लहानलाई खुला दिशामुक्त बनाउने यो अभियानलाई सम्पूर्ण नगरवासीले साझा अभियानका रूपमा सहयोग गर्न अपिल गर्छु ।’
अभियानलाई प्रभावकारी बनाउन नगरमा एउटा, २४ वटै वडा र ८१ वटा टोलस्तरीय खानेपानी तथा सरसफाइ स्वच्छता समिति गठन गरी काम सुरु गरिएको छ । यी समितिमा स्थानीय युवा र क्लबलाई सक्रिय बनाउँदै घरायसी सरसफाइ, महिनावारी स्वच्छता व्यवस्थापन र पानीजन्य रोग नियन्त्रणका लागि जनचेतनामूलक कार्यक्रम सञ्चालन गरिँदैछ ।
अहिलेसम्म ४ सय ६० घरधुरीमा शौचालय निर्माण सम्पन्न भएको छ । २०३ घरधुरीमा शौचालय निर्माण कार्य अन्तिम चरणमा पुगेको छ । खानेपानी र सरसफाइ क्षेत्रमा सहकार्य गरिरहेको विकन परियोजनाका प्रबन्धक राजेश लोहनीले टोलस्तरमै समिति गठन गरेर युवालाई जिम्मेवारी दिइएको र यसले सरसफाइ बानी व्यवहारमा सुधार ल्याउने विश्वास व्यक्त गरेका छन् ।
प्रतिक्रिया दिनुहोस !
