मापसे गरेर चलाएको ग्यास ट्याङ्करले ई–रिक्सालाई दियो ठक्कर : घाइते ९ जनामध्ये ६ जना गम्भीर
साउन २१, २०८३ बिहीबार १३:२५:४
काठमाडौं : वीरगञ्ज महानगरपालिका –२४ बहुअरी चोकस्थित हुलाकी सडक-खण्डमा ग्याँस ट्याङ्करले ई–रिक्सालाई पछाडिबाट ठक्कर दिँदा ई–रिक्सामा सवार ९ जना घाइते भएका छन् ।
बुधबार राति करिब ८ बजे पावरहाउसतर्फबाट तिलावे पुलतर्फ जाँदै गरेको ई–रिक्सालाई सोही दिशाबाट आउँदै गरेको ग्याँस ट्याङ्करले पछाडिबाट ठक्कर दिएर फरार भएको प्रहरीले जनाएको छ।
दुर्घटनामा घाइते भएका ९ जनामध्ये ६ जनाको अवस्था गम्भीर र ३ जनाको अवस्था मध्यम रहेको छ । सबै घाइतेहरुलाई उद्धार गरी वीरगञ्जस्थित नारायणी न्युरो अस्पतालमा लगि उपचार भइरहेको प्रहरीको भनाई छ ।
दुर्घटनापछि फरार भएको ग्याँस ट्याङ्कर र चालकलाई नियन्त्रणमा लिइएको छ । चालक भारतको मुजफ्फरपुर जिल्ला साहेबगञ्जका अन्दाजी ४८ वर्षीय धनेश्वर राय रहेका छन् । चालकले मादक पदार्थसमेत सेवन गरेको स्वास्थ्य परीक्षण पश्चात खुल्न आएको प्रहरीले जनाएको छ ।
प्रतिक्रिया दिनुहोस !
