विराटनगर : मोरङको सुनवर्षी नगरपालिका–९ डाइनियास्थित मुस्लिम टोलमा ४ वर्षीया बालिकाको हत्या गरेको आरोपमा प्रहरीले छिमेकीलाई पक्राउ गरेको छ। पक्राउ पर्नेमा ५९ वर्षीय जान मोहमद मन्सुरी रहेका छन्। इलाका प्रहरी कार्यालय रंगेलीका इन्स्पेक्टर अशोककुमार झाको नेतृत्वमा खटिएको टोलीले बुधबार उनलाई नियन्त्रणमा लिएको हो। प्रहरीका अनुसार साउन ८ गते साँझ जफारुल मियाँकी ४ वर्षीया छोरी कायानत खातुन घरबाट हराएकी थिइन्।
परिवार र स्थानीयले खोजी गर्ने क्रममा घरदेखि करिब २ सय मिटर पूर्व रहेको घन्सीबारीमा उनको शव फेला परेको थियो। निधार र कन्चटमा गहिरो चोट रहेको अवस्थामा भेटिएको हो। मोरङ प्रहरी प्रमुख एसपी कवित कटवालका अनुसार प्रारम्भिक अनुसन्धानमा मन्सुरीले आफ्नै बारीमा रहेको अम्बा खान आएको भन्दै बालिकामाथि इँटाले प्रहार गरेको खुलेको छ। घटनापछि शव घन्सीबारीमा फालिएको अनुसन्धानबाट देखिएको प्रहरीले जनाएको छ।
प्रहरीका अनुसार बालिकाको घर र आरोपितको घरबीच करिब २ सय मिटरको दूरी रहेको छ। घटनास्थलको अवस्थिति, संकलित परिस्थितिजन्य प्रमाण तथा अनुसन्धानका क्रममा प्राप्त विवरणका आधारमा मन्सुरीमाथि शंका केन्द्रित भएको र उनले घटनामा संलग्नता स्वीकार गरिसकेको प्रहरीले जनाएको छ।
प्रहरीले पक्राउ परेका मन्सुरीविरुद्ध कर्तव्य ज्यान मुद्दा चलाउन बिहीबार जिल्ला अदालत मोरङबाट म्याद थप गरी थप अनुसन्धान अघि बढाएको छ। घटनाका बारेमा अन्य तथ्यहरू अनुसन्धानबाट क्रमशः खुल्ने एसपी कटवालले बताए। बालिकाको शवको पोस्टमार्टम धरानस्थित बीपी कोइराला स्वास्थ्य विज्ञान प्रतिष्ठानमा गरिएको थियो। प्रारम्भदेखि नै विभिन्न कोणबाट अनुसन्धान अघि बढाएको प्रहरीले अन्ततः घटनामा संलग्न रहेको आरोपमा छिमेकीलाई पक्राउ गर्न सफल भएको हो।
प्रतिक्रिया दिनुहोस !
