दोलखा : दोलखाको रोल्वालिङ हिमश्रृंखला अन्तर्गतको यलुङ रि–हिमालको आधार शिविरमा पाँच जनाको शव फेला परेको छ । यलुङ रि–आधार शिविरमा देखिएको पाँच वटा शव गत वर्ष कात्तिक १७ गते यलुङ रि आरोहणका क्रममा हिमपहिरोमा परेकाहरुको हुन सक्ने जिल्ला प्रहरी कार्यालय दोलखाले जनाएको छ ।
गत वर्ष कात्तिक १७ गते यलुङ रि हिमाल आरोहणका क्रममा पाँच विदेशीसहित दुई नेपाली हिमपहिरोमा परेका थिए । हिमपहिरोमा परेका दुई जनाको शव फेला परे पनि पाँच जना बेपत्ता भएका थिए । हिउँ पग्लिएपछि बिहीबार शव देखिएको र स्थानीयले तत्काल लिखित रूपमा प्रहरीलाई खबर गरेको जिल्ला प्रहरी कार्यालय दोलखाले जनाएको छ । शुक्रबार हेलिकोप्टरमार्फत प्रहरी टोली यलुङ रिको आधार शिविरमा पुगे पनि मौसम खराब भएपछि शव नलिई फर्केको पनि जनाएको छ ।
गत वर्ष कात्तिक १७ गतेको हिमपहिरोमा नेपाली पथ प्रदशर्क सोलुखुम्बुको माप्य दूधकोशी गाउँपालिका–५ का मेरे कार्की र दोलखाको गौरीशंकर गाउँपालिका–९ का पदम तामाङको मृत्यु भएको थियो । हिमपहिरोमा परी इटलीका २, क्यानडाका १, फ्रान्सका १ र जर्मनीका १ पर्वतारोही बेपत्ता भएका थिए । यलुङ रिमा देखिएको शव हिमपहिरोमा बेपत्ता भएकाहरूको नै हो वा होइन भन्ने पहिचान भएपछि मात्रै भन्न सकिने प्रहरी कार्यालय दोलखाले जनाएको छ । सबै शव मौसमअनुकूल हुने बित्तिकै ल्याइने पनि जनाएको छ ।
प्रतिक्रिया दिनुहोस !
