ग्यासमा कालो बजारी : सिरहामा सरकारले तोकेभन्दा प्रति सिलिन्डर २० रुपैयाँ बढी असुली

सिरहा : सरकारले पूरा सिलिन्डर खाना पकाउने एलपी ग्यासको मूल्य बिक्री वितरणका लागि २०६० रुपैयाँ तोकेको छ । तर, सिरहामा डिलर र पसलवाला बिक्रेताहरूले उपभोक्तासँग सेवा शुल्कको नाममा थप २० रुपैयाँ असुली रहेको छ ।

२ हजार ८० रुपैयाँ तिर्नुपर्ने भएपछि चौतर्फी विरोध हुन थालेको छ । लहान नगरपालिकाले बढी लिएको रुपैयाँ फिर्ता गर्न निर्देशन जारी गरेका थिए । तर, सुनुवाइ भएको छैन ।

´सरकारले खाना पकाउने एलपी ग्यासको मूल्य निर्धारण गर्छ । नियामक निकायले त्यसको कार्यान्वयन गराउँछ । उपभोक्ताले सरकारले तोकेको मूल्य तिर्छन् र व्यवसायीले त्यही मूल्यमा ग्यास बिक्री गर्नुपर्छ,´एक उपभोक्ताले भने,´ तर यहाँ बिक्रेतासँगले पत्र नै लेखेर २० रुपैयाँ लिन लगाउँदै छ । नियामक निकाय केही गरिरहेको छैन ।` चारैतिर करको मारमा सर्वसाधारण रहेकै बेला ग्यासमा बढी रुपैयाँ तिर्नुपर्दा आर्थिक बोझ थपिएको उनले सुनाए ।

ग्यास बिक्रेता संघ सिरहाका अध्यक्ष प्रति सिलिन्डर सरकारले तोकेको भन्दा बढी रकम लिने गरेको स्वीकार गरेका छन् । उनका अनुसार डिलरको गोदाम भाडा, लेवर चार्ज बढी लागेपछि सेवा शुल्क २० रुपैयाँ लिने गरिएको छ । यस्तो नियम सिरहा मात्रै नभएर अन्य ठाउँमा पनि रहेको उनको तर्क छ ।