सिरहा : सिरहामा प्रहरीले लागूऔषध गाँजा जस्तो देखिने पदार्थसहित एक जनालाई पक्राउ गरेको छ । चार जना फरार रहेका छन् । जसमध्ये दुई जनाको पहिचान खुलेको छ ।
प्रहरीले नियन्त्रणमा लिएका भगवानपुर गाउँपालिका–४ जमुवाटोलका ४३ वर्षीय मोहन साह रहेका छन् । सोही ठाउँका ४३ वर्षीय कलेन्द्र यादव र ४५ वर्षीय ब्रहमदेव यादवसहित ४ जना फरार छन् । जिल्ला प्रहरी कार्यालय सिरहाका सखुवानन्कारकटी गाउँपालिका–४ सिमरास्थित बलान खोलामा इलाका प्रहरी कार्यालय लहान र इलाका प्रहरी कार्यालय महेशवारीबाट खटिएको संयुक्त प्रहरी टोलीले गस्ती गर्ने क्रममा पाँच जना मानिस बोरा बोकी हिँडिरहेको अवस्थामा फेला पारेको थियो ।
प्रहरी टोलीलाई देखेपछि उनीहरूले बोरा फाली भाग्न खोजेका थिए । प्रहरीले एक जनालाई नियन्त्रणमा लिएको र बाँकी चार जना फरार भएको जनाएको छ । नियन्त्रणमा लिएका व्यक्तिले बोकेको बोरा जाँच गर्दा गाँजा जस्तो देखिने पदार्थ फेला परेको थियो । उक्त पदार्थ तौल गर्दा ९१ किलो २५ ग्राम रहेको प्रहरीले जनाएको छ । प्रहरीका अनुसार घटनाबारे थप अनुसन्धान भइरहेको छ भने फरार रहेका अन्य व्यक्तिहरूको खोजी कार्य जारी रहेको छ ।
प्रतिक्रिया दिनुहोस !
