वीरगन्ज नाकाबाट ३ सय ७८ महिला र बालिकाको उद्धार, प्रेम सम्बन्ध र नेटवर्किङ कम्पनी मुख्य चुनौती
साउन ३०, २०८३ शनिबार १९:१:३९
वीरगन्ज : वीरगन्ज नाकाबाट तीन वर्षको अवधिमा मानव बेचबिखन तथा ओसारपसारको जोखिममा परेका ३ सय ७८ जना महिला तथा बालबालिकालाई उद्धार गरिएको छ। नाकामा परिचालित माइती नेपाल र प्रहरीको पहल र सहयोगमा आर्थिक वर्ष २०८०/०८१ देखि आर्थिक वर्ष २०८२/०८३ सम्म तीन वर्षको अवधिमा ३ सय ७८ जना महिला तथा बालबालिकालाई उद्धार गरिएको हो।
वीरगन्जमा आयोजित एक कार्यक्रममा माइती नेपालकी पर्सा संयोजक गोमा पौडेलले वीरगन्ज नाकाबाट आर्थिक वर्ष २०८०/०८१ मा ७९ महिला र ३२ बालिका गरी १११ जना, आर्थिक वर्ष २०८१/०८२ मा १०९ महिला र ६० बालिका गरी १६९ जना र गत आर्थिक वर्ष २०८२/०८३ मा ६३ महिला र ३५ बालिका गरी ९८ जनालाई उद्धार गरिएको जानकारी गराइन्।
‘प्रेम सम्बन्ध’ र ‘नेटवर्किङ कम्पनी’ मुख्य चुनौती
पौडेलका अनुसार पछिल्लो समय मानव बेचबिखन र ओसारपसारको स्वरूप फेरिँदै गएको छ। पछिल्लो समय १६ देखि १९ वर्ष उमेर समूहका किशोरीहरू सामाजिक सञ्जालमार्फत चिनजान गरी ‘प्रेम सम्बन्ध’को बहानामा बढी जोखिममा पर्ने गरेको देखिएको उनले बताइन्।
नेपाल–भारत सीमा क्षेत्रमा मानव बेचबिखन तथा ओसारपसारको जोखिमपूर्ण अवस्थामा रहेकाहरू भारत जानुको मुख्य कारण ‘प्रेम सम्बन्ध’ र ‘नेटवर्किङ कम्पनी’को प्रलोभन देखिएको छ। माइती नेपाल लगायतका संघ–संस्था र सुरक्षा निकायले सीमा नाकामा गरेको कडाइ र निगरानीका क्रममा यस्तो तथ्य फेला परेको पौडेलले जानकारी गराइन्।
उनका अनुसार गत आर्थिक वर्षमा भारत जान लागेको अवस्थामा वीरगन्ज नाकामा रोकिएका कुल ९८ जनामध्ये सबैभन्दा धेरै ३४ जना प्रेम सम्बन्धमा परी भारततर्फ जान लागेका थिए। यो तथ्यांकले बालिका र किशोरीहरू भावनात्मक सम्बन्धको आवरणमा बेचबिखनको ठूलो जोखिममा रहेको प्रस्ट पारेको उनले बताइन्।
यस्तै उद्धार गरिएका ९८ जनामध्ये १५ जना घुम्ने बहानामा,१२ जना नेटवर्किङ कम्पनीमा काम गर्ने लोभमा, ११ जना जाने ठाउँ उद्देश्यको अत्तोपत्तो नभएका, ९ जना सामान किन्न जाने बहाना ,७ जना अन्य काम गर्ने बहाना, ४ जना आफन्त भेटघाट गर्न, ३ जना आर्केस्ट्रामा काम गर्न, २ जना उपचारको बहाना र १ जना वैदेशिक रोजगारमा जाने बहाना बनाएकाहरु रहेको उनले जानकारी गराइन्।
प्रतिक्रिया दिनुहोस !
