एजेन्सी /रियाद: विश्व फुटबलका सुपरस्टार क्रिस्टियानो रोनाल्डोको जीवनमा पछिल्ला केही साता निकै व्यस्त र भावनात्मक बनेका छन्। २०२६ फिफा विश्वकपमा पोर्चुगलको यात्रा अन्तिम १६ मै टुंगिएपछि केही समय मैदानबाट टाढा रहेका रोनाल्डोले व्यक्तिगत जीवनमा महत्वपूर्ण निर्णय लिँदै लामो समयदेखिकी प्रेमिका जर्जिना रोड्रिग्वेजसँग विवाह गरेका छन्। विवाहको दुई दिनमै उनी पुनः क्लब फुटबलको तयारीमा फर्किएका छन्। ४१ वर्षीय रोनाल्डोले गत मंगलबार पोर्चुगलको कास्काइसमा जर्जिनासँग निजी समारोहबीच विवाह गरेका थिए।
करिब एक दशक लामो सम्बन्धपछि भएको यो विवाहलाई उनीहरूको पारिवारिक जीवनको नयाँ अध्यायका रूपमा हेरिएको छ। विवाहको पुष्टि रोनाल्डोको व्यवस्थापन टोलीले गरेको थियो भने रोनाल्डो आफैंले सामाजिक सञ्जालमा विवाहका औँठी देखिने तस्बिर सार्वजनिक गर्दै सम्बन्धलाई औपचारिक रूप दिएका थिए।
विवाह समारोह अत्यन्तै निजी राखिएको थियो। उनीहरूका पाँच सन्तान पनि समारोहमा सहभागी भएका थिए। रोनाल्डो र जर्जिनाको सम्बन्ध सन् २०१६ देखि निरन्तर रहँदै आएको छ। सन् २०२५ को अगस्टमा जर्जिनाले सामाजिक सञ्जालमार्फत इन्गेजमेन्टको घोषणा गरेकी थिइन्।
त्यसको ठीक एक वर्षपछि उनीहरूले विवाह गरेका हुन्। तर, व्यक्तिगत जीवनको यो महत्वपूर्ण क्षणपछि रोनाल्डो लामो समय आराम गर्ने मुडमा भने देखिएनन्। विवाह भएको दुई दिनमै उनी साउदी अरेबियाको क्लब अल नासरको प्रशिक्षणमा फर्किएका छन्। उनले प्रशिक्षण पोसाकमा आफ्ना तस्बिर सामाजिक सञ्जालमा पोस्ट गर्दै छोटो तर अर्थपूर्ण शब्द ‘ब्याक’ लेखेका थिए। उनको यो पोस्ट्ले उनी नयाँ सिजनका लागि पुनः पूर्णरूपमा फुटबलमा केन्द्रित भएको देखिएको छ।
रोनाल्डो प्रशिक्षणमा फर्किंदा उनको नयाँ हेयरस्टाइलले पनि चर्चा पाएको छ। उनले लामो समयदेखि देखिँदै आएको गाढा कपालको शैली परिवर्तन गर्दै तामाको जस्तो पहेंलो रंगको नयाँ लुकमा प्रशिक्षण गरेका छन्। विश्वकपका बेला देखिएको उनको शैलीभन्दा फरक यो नयाँ रूपले सामाजिक सञ्जालमा समेत प्रशंसकको ध्यान तानेको छ।
विश्वकपबाट अप्रत्याशित बिदाइ
रोनाल्डो अल नासर फर्किनुअघि उनको ध्यान विश्वकपमा थियो। अमेरिका, क्यानडा र मेक्सिकोमा संयुक्त रूपमा आयोजना भएको फिफा विश्वकप रोनाल्डोको अन्तर्राष्ट्रिय करियरको अन्तिम विश्वकप बन्न पुग्यो। पोर्चुगलले अन्तिम १६ मा स्पेनसँग १–० को हार बेहोरेपछि प्रतियोगिताबाट बाहिरिएको थियो। जुलाई ६ मा डालासमा भएको उक्त खेलमा मिकेल मेरिनोले अतिरिक्त समयमा गरेको गोल पोर्चुगलका लागि निर्णायक बनेको थियो।
त्यससँगै रोनाल्डोको विश्वकप यात्रा पनि समाप्त भएको थियो। यो रोनाल्डोको छैटौं विश्वकप सहभागिता हो र करिब २० वर्ष लामो विश्वकप यात्राको अन्तिम अध्याय पनि यही खेलसँग टुंगिएको थियो। विश्वकप सुरु हुनुअघि नै रोनाल्डोले आफू अब अर्को विश्वकपमा नखेल्ने संकेत दिएका थिए। स्पेनसँगको हारपछि उनले त्यस निर्णयलाई स्पष्ट पार्दै विश्वकपबाट आफ्नो बिदाइ भएको पुष्टि गरेका थिए। यसले उनको अन्तर्राष्ट्रिय करियरको भविष्यबारे पनि ठूलो बहस जन्माएको छ।
२०२६ को विश्वकपमा पुग्नुअघि रोनाल्डोले आफ्नो शारीरिक फिटनेसबारे उठेका प्रश्नको पनि जवाफ दिएका थिए। प्रतियोगिताअघि उनले आफू शारीरिक रूपमा ठीक रहेको बताएका थिए। अल नासरका लागि २०२५–२६ सिजनमा उनले ३७ खेलमा ३० गोल गरेको तथ्यांकले पनि उनी अझै उच्च स्तरमा प्रदर्शन गर्न सक्षम रहेको देखाएको थियो।
किन ढिलो भयो अल नासरको प्रशिक्षण ?
विश्वकपमा पोर्चुगलको यात्रा जुलाई ६ मा समाप्त भएपछि रोनाल्डोलाई केही समय आराम दिइएको थियो। अन्तर्राष्ट्रिय प्रतियोगितामा लामो समय व्यस्त रहेका खेलाडीलाई नयाँ क्लब सिजन सुरु हुनुअघि विश्राम दिने अभ्यासअनुसार उनी अल नासरको प्रारम्भिक प्रिसिजन क्याम्पमा सहभागी भएनन्।
अल नासरले जुलाई १९ देखि पोर्चुगलको राजधानी लिस्बनमा प्रिसिजन तयारी सुरु गरेको थियो। तर, विश्वकप खेलेका रोनाल्डो र अन्य अन्तर्राष्ट्रिय खेलाडीलाई अतिरिक्त बिदा दिइएको थियो। प्रारम्भिक योजनाअनुसार रोनाल्डो जुलाई अन्तिम साता वा अगस्टको सुरुवाततिर टोलीमा फर्किने अपेक्षा गरिएको थियो।
तर, अल नासरको प्रिसिजन क्याम्प सकिएपछि मात्र उनी टोलीसँग जोडिने अवस्था आएको हो। त्यसबीच उनको विवाहको तयारी पनि चलिरहेको थियो। विवाह सम्पन्न गरेपछि उनी रियाद फर्किए र टोलीको प्रशिक्षणमा सहभागी भएका हुन्।
नयाँ प्रशिक्षक, नयाँ सिजन र रोनाल्डोमाथिको जिम्मेवारी
रोनाल्डोको क्लबमा पुनरागमन नयाँ प्रशिक्षक एन्ज पोस्टेकोग्लुको नेतृत्वमा हुँदैछ। अल नासरले २०२६–२७ सिजनका लागि अस्ट्रेलियाली प्रशिक्षक पोस्टेकोग्लुलाई जिम्मेवारी दिएको छ। क्लबमा नयाँ प्रशिक्षकको आगमनसँगै टोलीको खेलशैलीमा पनि परिवर्तनको अपेक्षा गरिएको छ।
पोस्टेकोग्लुका लागि रोनाल्डो टोलीको सबैभन्दा महत्वपूर्ण खेलाडीमध्ये एक हुनेछन्। ४१ वर्षको उमेरमा पनि रोनाल्डोको गोल गर्ने क्षमता, अनुभव र नेतृत्व टोलीका लागि ठूलो सम्पत्ति मानिएको छ। नयाँ प्रशिक्षकले उनलाई कसरी प्रयोग गर्छन् भन्ने विषय आगामी सिजनको महत्वपूर्ण पक्ष बन्नेछ। रोनाल्डोको व्यक्तिगत लक्ष्य पनि अझै महत्वाकांक्षी छ। क्लब फुटबलमा उनी लगातार गोल गर्दै आफ्नो करियरको कुल गोल संख्या १ हजार पुर्याउने लक्ष्यतर्फ अघि बढिरहेका छन्। हाल उनको करियरमा ९७६ गोल पुगेको छ।
प्रतिक्रिया दिनुहोस !
