जनकपुरधाम: मधेश प्रदेशका स्थानीय तहमा कार्यरत कर्मचारीहरूको अन्तर-स्थानीय तह सरुवा प्रक्रिया सुरु भएको छ। मुख्यमन्त्री तथा मन्त्रिपरिषद्को कार्यालय, जनकपुरधामले एक सूचना जारी गर्दै योग्यता पुगेका स्थायी कर्मचारीहरूबाट भदौ २१ गतेभित्र निवेदन दिन आह्वान गरेको छ।
'सरुवा हुन चाहने इच्छुक कर्मचारीले मन्त्रालयमा निवेदन दर्ता गराउँदा मापदण्डको अनुसूची-१ बमोजिमको ढाँचामा स्पष्ट विवरण खुलाइएको निवेदन,सरुवा हुन चाहेको सम्बन्धित स्थानीय तहको अनुसूची-२ बमोजिमको सहमति पत्र (जसमा रिक्त पद, दरबन्दी र तह स्पष्ट खुलेको हुनुपर्ने) तथा प्रदेश निजामती किताबखानाको व्यक्तिगत सूचना प्रणाली (PIS) मा आफ्नो हाल कार्यरत कार्यालय, पद, श्रेणी/तह र समायोजनसम्बन्धी विवरण अद्यावधिक भएको हुनुपर्ने कागजातहरु पेश गर्नुपर्ने' जारी गरिएकाे सूचनामा उल्लेख छ ।
साथै अपाङ्गता भएका, दीर्घ रोगी, पति-पत्नी दुवै सरकारी सेवामा रहेका, गर्भवती वा दुई वर्षमुनिका बालबालिका भएका कर्मचारीको हकमा सो सम्बन्धी पुष्टि गर्ने आधिकारिक प्रमाण प्रस्तुत गरेमा प्राथमिकता दिइनेछ, भने प्रदेश लोक सेवा आयोगबाट सिफारिस भई सुरु पदस्थापन भएका र ऐनले तोकेको न्यूनतम सेवा अवधि पूरा नभएका कर्मचारीको सरुवा प्रक्रिया अगाडि नबढाइने मन्त्रालयले स्पष्ट पारेको छ।
तोकिएको म्याद नाघी आएका, रीत नपुगेका वा आवश्यक कागजात संलग्न नभएका निवेदनमाथि कुनै कारबाही नहुने सूचनामा जनाइएको छ। स्वीकृत मापदण्ड मन्त्रालयको वेबसाइट (www.ocmmc.madhesh.gov.np) बाट डाउनलोड गरी हेर्न सकिने शाखा अधिकृत विद्या तामाङद्वारा जारी सूचनामा उल्लेख छ।
।
प्रतिक्रिया दिनुहोस !
