अछामका जागेश्वर र खकेन्द्रको छैन अत्तोपत्तो, भौतारिदै काठमाडौं पुगे आफन्त

अछाम : रसुवाको भाटेकोशी नदीमा आएको बाढीमा परी बेपत्ता अछामका जागेश्वर शर्मा र खकेन्द्र विश्वकर्माको हालसम्म कुनैपनि खबर प्राप्त नभएपछि उनीहरूको खोजीका लागि परिवार काठमाडौं पुगेका छन्। 

घरमा बसेर खबर कुर्नुभन्दा अवस्था बुझ्न बेपत्ता शर्मा र विश्वकर्माको परिवार काठमाडौं पुगेका हुन् । तर, काठमाडौं आएर पनि उनीहरूको खोजेको जवाफ पाउन सकेका छैनन् ।  बेपत्ताका शर्मा र विश्वकर्माका परिवारले खोजीको याचना गरिरहेका छन्। 

हालसम्म बेपत्ता रहेका साँफेबगर नगरपालिका- ६ भाग्यश्वर डोटेका जागेश्वर शर्माको खोजीमा दाजु खिलराज काण्ठमाडौं पुगेका छन् । खिलराजका अनुसार बाढी आएको बिहीबार ८ दिन पुग्दासम्म पनि भाइ जागेश्वरको कुनै खबर आएको छैन । 

खिलराजकी भाइबुहारी कमलालगायत परिवार विक्षिप्त अवस्थामा छन् । अझै पनि जिउँदै फर्किने आश परिवारले मारिसकेका छैनन् । ११ वर्षीया छोरा अविरल बुवाको पर्खाइमा छ । भाइको खोजीमा खिलराज गत शुक्रबार काठमाडौं पुगेका हुन् । यत्रो दिन वितिसक्दा पनि भाइको कुनै खबर नपाएको उनी बताउँछन् । 

जागेश्वर शर्मा विगत ३ वर्षदेखि कृषि,वन तथा वातावरण मन्त्रालय,प्लान्ट क्वारेन्टाइन तथा विषादी व्यवस्थापन केन्द्र,प्लान्ट क्वारेन्टाइन कार्यालय,टिमुरे रसुवामा कार्यरत थिए । ‘चितवन तिर एउटा शंकास्पद शव फेला परेको छ भन्ने खबर पाएको छु,‘खिलराजले भने,'यसैको डीएनए परीक्षणका लागि छोरा अविरलसँगै रगत दिने लाइनमा उभिएको छु । डीएनएको कहिलेसम्म रिर्पाोट आउँछ भन्ने सम्बन्धीत निकायसँग जवाफ नै छैन । भदौ १० गते बिहान ७ बजे कुरा भएको थियो परिवारसँग त्यसपछि सम्पर्क हुनसकेन । बिहान ८:२१ मिनेटमा कार्यालयको सिस्टममा केहि सामाग्रीहरू अपडेट गरेको देखिन्छ । बिहान ७ बजेको फोन नै अन्तिम भयो ।’

अछाम चौरपाटी गाउँपालिका -४ पायलका खकेन्द्र विश्वकर्मा पनि अझै सम्म बेपत्ता छन् । आमा गंगा,वुवा शेरे,दाजु टिकाराम,हर्क लगायत सबै परिवार खकेन्द्रको खोजीमा ६ दिनअघि काठमाडौं पुगेका थिए । हालसम्म भाइ खकेन्द्रको कुनै पनि खबर प्राप्त नभएको दाजु हर्क लुहारले बताए । उनले भने,'डीएनए परिक्षणमा लागि रगत दिइसकेका छौं,भाइको खोजीका लागि सबै ठाउँ गुहारेका छौं तर, ८ दिन वितिसक्दा पनि केहि अत्तोपत्तो लागेको छैन । कहाँ छन्,कस्तो अवस्थामा छन् भन्ने थाहा नहुँदा हरेक क्षण भारी भइरहेको छ ।' 

२५ वर्षीय खकेन्द्र विगत ६ /७ वर्षदेखि रसुवागढी हाइड्रोपावर १११ मेगावाटमा कार्यरत थिए । दुवैजनाको अवस्थाबारे हालसम्म यकिन जानकारी प्राप्त हुन सकेको छैन । परिवारले सम्बन्धित निकायलाई खोजी कार्यलाई तीव्रता दिन र उनीहरूको अवस्थाबारे जानकारी गराइदिन आग्रह गरेका छन् । 

अछामका जिल्ला प्रहरी प्रमुख डीएसपी पविन्द्रबहादुर बम्मका अनुसार रसुवाको भोटेकोशीमा आएको बाढीमा परि अछामका तिन जना बेपत्ता रहेको थिए । त्यस मध्ये नेपाल आर्मीमा कार्यरत एक जना सम्पर्क आएको र अन्य दुई जना शर्मा र विश्वकर्मा अझै बेपत्ता रहेका छन् ।