दुबई : नेपाली सांगीतिक ब्यान्ड नेपथ्यले आगामी अक्टोबर ४ मा यूएईको दुबईमा लाइभ कन्सर्ट गर्ने भएको छ ।
ईजी ग्रुपको आयोजनामा 'नेपथ्य लाइभ इन् दुबई २०२६' आयोजना हुन लागेको हो । दुबईको इन्टरनेट सिटीस्थित 'द एजेन्डा' हलमा हुने कन्सर्टको तयारी अन्तिम चरणमा पुगेको आयोजकले जनाएको छ ।
कार्यक्रमबारे जानकारी दिन दुबईमा आयोजित पत्रकार सम्मेलनमा ईजी ग्रुपका अनिल लामिछानेले तयारी अन्तिम चरणमा रहेको बताए । उनका अनुसार कन्सर्ट नेपाली संगीतप्रेमीलाई मनोरञ्जन प्रदान गर्नुका साथै नेपाली संस्कृति संरक्षण तथा प्रवर्द्धन गर्ने उद्देश्यले आयोजना गर्न लागिएको हो ।
कार्यक्रमको मुनाफाको २० प्रतिशत भोटेकोशीमा आएको बाढीका कारण अनाथ भएका बालबालिकाको शिक्षाका साथै एकल महिलाको संरक्षणमा खर्च गरिने आयोजकले जनाएको छ ।
करिब पाँच हजार दर्शक क्षमताको द एजेन्डा हलमा आयोजना हुने कार्यक्रममा यूएईमा रहेका नेपालीलाई सहभागी हुन आयोजकले आह्वान गरेको छ । यूएईमा नेपथ्यको राम्रो क्रेज रहेको र दर्शक स्वस्फुर्त उपस्थित हुने गरेको पाइएको छ । नेपथ्यले यसअघि पनि यूएईमा विभिन्न सांगीतिक कार्यक्रम गर्दै आएको छ । चार वर्षपछि दुबईमा हुन लागेको यस पटकको कन्सर्टलाई थप प्रभावकारी बनाउने तयारी गरिएको आयोजकको दाबी छ ।
प्रतिक्रिया दिनुहोस !
