वाइडबडी खरिद प्रकरण : समिति गठन भएको १२ दिनमै संयोजक परिवर्तन !
मंसिर १९, २०७५ बुधबार १६:११:०
काठमाडौं : संघीय संसदको अन्तराष्ट्रिय सम्बन्ध समितिले नेपाल वायुसेवा निगमको वाइडबडी जहाज खरिद प्रकरणको छानबिनका लागि उपसमिति गठन गरेको १२ दिनमै संयोजक परिवर्तन गरेको छ।
कांग्रेस सांसद प्रकाशमान सिंहको संयोजकत्वमा समिति गठन गरेको १२ दिनपछि समितिले बुधबार सांसद दीपकप्रकाश भट्टको संयोजकत्वमा नयाँ उपसमिति गठन गरेको हो।
मंसिर ७ गते बसेको समिति बैठकले सिंहको संयोजकत्वमा तीन सदस्यीय उपसमिति गठन गरेको थियो। तर सिंहले वाइडबडी खरिद प्रकरणको छानबिन समितिमा बस्न नसक्ने बताएपछि बुधबारको बैठकले सांसद भट्टको संयोजकत्वमा पाँच सदस्यीय उपसमिति गठन गरेको हो।
समिति सदस्यमा सांसद दिव्यमणि राजभण्डारी, रेनुका गुरुङ, सरलकुमारी यादव, सुदन किराती रहेका छन्। यसअघि गठन भएको समिति सदस्यमा रहेकी संघीय समाजवादी फोरमकी सांसाद गुरुङ नयाँ समितिमा समेटिएकी छन् भने नेकपा सांसद नारदमुनी राना समेटिएका छैनन्।
सिंहले पार्टीको काममा व्यस्त रहनु परेको भन्दै छानबिन समितिमा बस्न अस्वीकार गरेपछि समितिले नयाँ संयोजक बनाउने निर्णय गरेको बताएको छ।
प्रतिक्रिया दिनुहोस !
