१८ वर्ष लामो पर्खाइ।
नम्बर एक खेलाडी च्याम्पियन बन्ने प्रतीक्षामा।
२००८ मा इन्डियन प्रिमियर लिग (आईपीएल)को सुरुवातसँगै सुरु भएको यो पर्खाइ मंगलबार (जुन ३, २०२५) मा समाप्त भयो।
आईपीएल २०२५ को फाइनल खेलमा जब पञ्जाब किंग्सका ब्याट्सम्यान शशांक सिंहले अन्तिम ओभरको दोस्रो बलमा चौका हान्न चुके तब आरसीबीको जित करिब निश्चित भयो। अनि विराट कोहलीका ओसिलो आँखाले अधुरो सपना पूरा भएको कथा भन्न थाले।
यसपछि, प्रत्येक पासिङ बलसँगै आरसीबीको जित निश्चित भयो र विराट कोहलीको भावना चरम सीमामा पुग्यो।
कतिबेला उनी आफ्ना भिजेका आँखा लुकाइरहेका थिए भने कतिबेला आकाशतिर हेरिरहेका थिए। आरसीबीले पञ्जाब किंग्सलाई छ रनले पराजित गर्ने बित्तिकै विराट कोहलीको खुशीको सीमा रहेन। त्यसपछि कोहली भुईँमा घुँडा टेकेर बसे र आफ्नो अनुहार हातले छोपे।
जितसँगै विराट भावुक हुँदै यो दिन कहिल्यै आउला भनेर नसोचेको बताए।
२००८ मा आरसीबीले विराटमाथि मारेको थियो बाजी
आरसीबीले विराट कोहलीमाथि बाजी लगाएको समयमा उनले टिम इन्डियाको लागि डेब्यू पनि गरेका थिएनन्। आरसीबी पहिलो पटक च्याम्पियन बनेको बारेमा विराट कोहलीले यो जित टिमको लागि जति महत्त्वपूर्ण छ त्यति नै फ्यानहरूको लागि पनि रहेको बताए।
विराट कोहलीले भने,‘१८ वर्षको लामो प्रतीक्षा थियो। मैले मेरो युवावस्था, मेरो श्रेष्ठता, मेरो अनुभव दिएँ। मैले सबैथोक दिएँ। मैले कहिल्यै सोचेको थिइनँ कि यो दिन कहिल्यै आउला। अन्तिम बल फ्याँक्ने बित्तिकै म भावुक भएँ।’
उनले थप भने, ‘जे भए पनि, म यो टोलीसँग जोडिएर बसें। केही क्षणहरू थिए जब मैले फरक तरिकाले सोचें, तर पनि म यो टोलीसँग जोडिएर बसें। मेरो मन बैंगलोरसँग छ, मेरो आत्मा बैंगलोर र यो टोलीसँग छ। यो टोली हो जुन म आईपीएल खेलुञ्जेलसम्म रहनेछु।’
विराट कोहलीले यो जित आफ्नो करियरको उत्कृष्ट क्षणहरूमध्ये एक भएको बताए।
विराटले भने, ‘आज म बच्चा जस्तै सुत्नेछु। लिलामी पछि धेरै मानिसहरूले हामीलाई प्रश्न गरे। तर हामीसँग जे थियो त्यसमा हामी खुसी थियौँ। मेरो बारेमा पहिले नै धेरै कुरा भनिएको छ। यो जित बैंगलोरको लागि हो।’
पहिलो सिजनमा विराटले पाएका थिए २० लाख
२००८ मा उनको नेतृत्वमा टिम इन्डियाले अन्डर–१९ विश्वकप जित्दा विराट कोहली चर्चामा आए।
विराट कोहलीसँग अन्तर्राष्ट्रिय क्रिकेट खेल्ने अनुभव नभएकाले उनलाई पहिलो सिजनमा आरसीबीले २० लाख रुपैयाँमा किनेको थियो।
इन्डियन एक्सप्रेसलाई दिएको एक अन्तर्वार्तामा विराट कोहलीले पहिलो सिजनको लिलामीको बारेमा उल्लेख गरेका थिए। उनले भनेका थिए , ‘लिलामी हुँदा हामी मलेसियामा थियौँ। हामीलाई प्रथम श्रेणीका क्रिकेटरको रूपमा किनिएको थियो जसलाई २० लाख रुपैयाँ दिइएको थियो। हाम्रो खुशीको सीमा थिएन। हामीले २० लाख रुपैयाँ पायौं। यसको पछाडि भावनाहरू थिए।’
यसपछि विराट कोहलीले आईपीएल र अन्तर्राष्ट्रिय क्रिकेटमा कहिल्यै पछाडि फर्केर हेरेनन्।
पहिलो सिजनमा विराट कोहलीले धेरै रन बनाएनन् र १३ खेलमा उनले केवल १६५ रन बनाए। तर २०१० सम्ममा उनको प्रदर्शनमा सुधार आयो र पहिलो पटक उनले एक सिजनमा ३०० भन्दा बढी रन बनाउन सफल भए।
२०११ मा कप्तान
२०११ मा विराट कोहलीलाई रोयल च्यालेन्जर्सको कप्तान नियुक्त गरिएको थियो। विराट कोहलीले ब्याटिङबाट उत्कृष्ट प्रदर्शन गर्दै १६ खेलमा ५५७ रन बनाए र आरसीबी दोस्रो पटक आईपीएलको फाइनलमा पुग्न सफल भयो।
तर धोनीको चेन्नई सुपर किंग्सले आरसीबीलाई उपाधि जित्नबाट रोक्यो।
वर्षौंको निराशा पछि विराट कोहली २०१६ मा फरक दृढ संकल्पका साथ मैदानमा प्रवेश गरे। विराट कोहलीले एउटै सिजनमा धेरै नयाँ रेकर्ड बनाए।
विराट कोहलीले १६ खेलमा कीर्तिमानी ९७३ रन बनाए। उनले चार शतक र सात अर्धशतक बनाए। आरसीबी तेस्रो पटक फाइनलमा पुगेको थियो।
तर सनराइजर्स हैदराबादले फाइनलमा रोयल च्यालेन्जर्स बैंगलोरलाई मात्र आठ रनले पराजित गर्यो र विराट कोहलीको सपना फेरि एक पटक अधुरो रह्यो।
पूरा भएको सपना
प्रत्येक वर्ष बित्दै जाँदा विराट कोहलीको ब्याटबाट रनहरू निस्किरहे। तर उपाधि जित्नु टोलीको लागि सपना मात्र रह्यो।
च्याम्पियन बन्न नसकेको निराशाका बीचमा विराट कोहलीले २०२३ सिजन सुरु हुनुभन्दा अगाडि नै आरसीबीको कप्तानी छोडे।
तर उनले आरसीबीलाई च्याम्पियन बनाउन ब्याटिङमा उत्कृष्ट प्रदर्शन गरिरहे।
२०२३ मा विराट कोहलीले ६३९ रन बनाएका थिए भने २०२४ मा उनले ७४१ रन बनाउन सफल भए।
यसैबीच विराट कोहली आईपीएलमा आठ हजार रन बनाउने पहिलो खेलाडी बने। यस वर्ष पनि विराट कोहलीले आरसीबीलाई च्याम्पियन बनाउन आफ्नो सम्पूर्ण प्रयास गरे।
विराट कोहलीले १५ खेलमा ६५७ रन बनाए र अन्ततः आफ्नो १८ वर्ष पुरानो सपना साकार भएको देखे।
प्रतिक्रिया दिनुहोस !
