भोजपुरमा श्रीमतीसहित चार जनाको सामूहिक हत्या, हत्यारा पनि गम्भीर घाइते
असार २२, २०८२ आइतबार १२:८:४६
भोजपुर : भोजपुरमा एक युवकले आफ्नै श्रीमतीसहित चार जनाको धारिलो हतियार प्रयोग गरेर हत्या गरेका छन् । रामप्रसादराई गाउँपालिका –२, धोद्लेखानीस्थित ससुराली गएका २७ वर्षीय राजेन्द्र राईले श्रीमतीसहित चार जनाको हत्या गरेको प्रहरीले जनाएको छ ।
प्रहरीका अनुसार राजेन्द्रकी १६ वर्षीया पत्नी मनिषा गिरी, उनका ससुरा बेलबहादुर गिरी, सासू मञ्जु गिरी र सालो ९ वर्षीय सपन गिरीको हत्या भएको हो। आरोपित राजेन्द्र आफैँ गम्भीर घाइते छन् । राजेन्द्रको पेटमा गहिरो चोट लागेको र भोजपुर अस्पतालमा प्राथमिक उपचारपछि थप उपचारका लागि विराटनगर रिफर गरिएको जिल्ला प्रहरी कार्यालय भोजपुरका ईन्सपेक्टर दिपक श्रेष्ठले जानकारी दिए ।
सासूले नै पहिला छुरीले आक्रमण गरेको आरोपितको बयान
हातमा छुरी देखेपछि त्यहि छुरी खोसेर चारै जनामाथि प्रहार गरेको बयानका क्रममा प्राप्त भएको प्रहरी जनाएको छ । घटनापछि राजेन्द्र आफैँले प्रहरीलाई फोन गरेर हत्या स्वीकार गर्दै ‘मैले चार जनालाई छुरी हानेको छु, सायद मरिसके होलान्’ प्रहरीमा खबर गरेको ईन्सपेक्टर श्रेष्ठले बताए ।
तनाव उत्पन्नका कारण : प्रेम सम्बन्ध र दोस्रो विवाह
प्रहरीका अनुसार राजेन्द्रको मनिषासँग दोस्रो विवाह गरेको खुलेको छ । पहिलो पत्नीले छाडेपछि केही महिनाअघि मात्रै उनले १६ वर्षीया मनिषालाई भगाएर ल्याएका थिए । तर उमेर नपुगेको भन्दै मनिषाका परिवारले उनीहरूलाई स्वीकार नगरेको प्रहरीको भनाई छ ।
मनिषा एक महिनादेखि माइतमै बस्दै आएकी थिइन् । राजेन्द्र ४–५ दिनअघि मात्र उनलाई लिन ससुराली गएका थिए । तर सासू ससुराले छोरी दिन नमानेपछि तनाव बढेको प्रहरीको भनाइ छ ।
प्रहरी अनुसन्धान जारी
इन्स्पेक्टर श्रेष्ठका अनुसार घटनास्थलमा प्रहरी टोली परिचालन गरिएको छ । पोस्टमार्टमको लागि मृतक सबैको शव जिल्ला अस्पताल भोजपुर ल्याउने तयारी भइरहेको उनले बताए ।
प्रहरीले घटनाबारे थप अनुसन्धान गरिरहेको छ भने घाइते आरोपित राजेन्द्रको स्वास्थ्य अवस्था पनि गम्भीर रहेको जनाएको छ ।
प्रतिक्रिया दिनुहोस !
