अछाम: शारीरिकरुपमा अशक्त १६ वर्षीय हिमाल परियारले यहि मंसिर ९ गते ह्वीलचियर पाए । ६ वर्षको उमेरदेखि खुट्टा टेकेर हिँड्न नसकेका चौरपाटी गाउँपालिका -१ सिउडीका हिमालले ह्वीलचियर पाएपछि जीवनमै नसोचेको कुरा प्राप्त भएको भन्दै खुशी व्यक्त गरे। उनका दुवै खुट्टा लुला छन् । हातमा चप्पल लगाएर घिस्रिएर हिँड्ने उनलाई ह्वील चेयर जीवनकै अमूल्य उपहार बनेको छ। घर नजिकैको बजार उनले कहिल्यै देखेका थिएनन् । ह्वीलचियर पाएपछि उनी खुशी हुँदै भाइको सहारामा बजारभरी फन्को लगाए ।
तुर्माखाँद गाउँपालिका ७ मा ४६ वर्षीय नमन शाहीको कम्मर मुनिको भाग चल्दैन । ४ वर्ष पहिले घाँस काट्ने क्रममा रुखबाट लडेर शाही घाइते भएका थिए । उपचार गराउँदा समेत निको नभएपछि शाही अहिले ह्वीलचियरको सहारामा छन् । आफैले किनेको ह्वीलचियर थोत्रो भइसकेको थियो । उनले जेनतेन चलाइरहेका थिए । नयाँ र सहज तरिकाको ह्वील चियर पाएपछि उनी पनि खुशी छन्।
साँफेबगर नगरपालिका -२ जाल्पादेवीकी २१ वर्षीय नविन आउजी पनि ह्वील चेयर पाएपछि निकै खुशी छन् । नविनको कक्षा ९ मा पढ्दै गर्दा खुट्टामा समस्या देखा पर्यो । पहिले लठ्ठीको सहरा,त्यसपछि बैशाखी हुँदै अहिले खुट्टा नै नचल्ने भएपछि ह्वीलचियरको सहारामा दैनिकी कटाइरहेका छन्। आर्थिक अभावका कारण ह्वीलचियर किन्न सकेका थिएनन् । उनले आफ्ना हरेक काम गर्दा परिवारको सहरा लिनुपर्छ । अब ह्वीलचियरले निकै सहज हुने उनले बताइन् । आफूहरू जस्तो बेसहारालाई ह्वीलचियर निकै ठूलो सहारा भएको उनले बताइन् ।
सम विकास नेपालद्धारा सञ्चालित हाम्रो पहिचान परियोजनामार्फत् ह्वीलचियर वितरण गरिएको हो। तुर्माखाँद,ढकारी ,चौरपाटी गाउँपालिका र साँफेबगर नगरपालिकाका २० जना अपाङ्गता भएका व्यक्तिलाई ह्वीलचियर वितरण गरिएको समविकास नेपालका पशुपति साउदले बताइन् ।
अपाङ्गता भएका परिवारको आर्थिक अवस्था कमजोर भएका कारण ह्वीलचियर वितरण गरिएको उनले बताइन् । संस्थाले वितरण गरेको ह्वील चियरले ठूलो राहत भएको साउदले बताइन् । तीन पालिकाकाबाट २६ जना अपाङ्गता भएका व्यक्तिको विवरण प्राप्त भएकाले अन्य व्यक्तिहरूलाई पनि ह्वीलचियर वितरण गरिने उनले बताइन् ।
अपाङ्गता भएका व्यक्तिहरूको ३४ औं अन्तर्राष्ट्रिय दिवस आज विभिन्न कार्यक्रमका साथ मनाइँदैछ। अपाङ्गता भएका नागरिकहरूको हक अधिकार प्रवर्द्धनका लागि विश्वभर संयुक्त राष्ट्रसंघको पहलमा सन् १९९२ देखि हरेक वर्ष डिसेम्बर ३ तारिखका दिन अपाङ्गता भएका व्यक्तिहरूको अन्तर्राष्ट्रिय दिवस मनाउन थालिएको हो।
प्रतिक्रिया दिनुहोस !
