गोरखा : चुमनुब्री—३ जगतका वीरबल घलेले सामाजिक सञ्जाल फेसबुकमा घरभित्र बलिरहेको टुकीको भिडियो जारी गर्दै लेखे, ‘हामी फेरि टुकीको युगमा पुग्यौं ।’
त्यही पोस्टमा पहिलो टिप्पणी थियो, धार्चे गाउँपालिका— २ केरौंजाका शुभराज घलेको । अर्को टुकीको तस्बिर पोस्ट गर्दै उनले लेखे, ‘हाम्रो गाउँको हालत पनि त्यस्तै छ दाजु ।’
यी दुईमात्र होइन, यतिबेला उत्तरी गोरखाका धेरै गाउँबस्तीहरू विद्युत् सेवाबाट वञ्चित छन् । हिमालपारिको चुमनुब्री गाउँपालिका र धार्चे गाउँपालिकाका आधा दर्जनभन्दा धेरै गाउँबस्ती करिब एक महिनादेखि विद्युत्विहीन भएका स्थानीयहरूले बताएका छन् ।
चुमनुब्री गाउँपालिका—१ सामागाउँ र साम्दो विद्युत्विहीन भएको ठ्याक्कै एक महिना पुगेको छ । मंसिरको अन्तिम सातादेखि विद्युत् सेवाविहीन भएको त्यहाँका पूर्ववडाध्यक्ष वीरबहादुर लामाले जानकारी दिए । सामागाउँ लघुजलविद्युत् आयोजनामा खराबी आएपछि सामागाउँ र साम्दोका करिब तीन सय घरधुरीका बासिन्दा विद्युत् सेवाबाट वञ्चित भएका उनको भनाइ छ ।
धार्चे गाउँपालिका—१ को रुन्चेत र केरौंजाका गरी करिब सात सय घरधुरीका बासिन्दाले अन्धकारमै रात गुजार्न थालेको पनि एक महिना भएको स्थानीय सुकबहादुर गुरुङ बताउँछन् । चुमनुब्री गाउँपालिका—३ जगत, सल्लेरी र भालुवनका बासिन्दा पनि तीन सातादेखि विद्युत् सेवा उपभोग गर्नबाट वञ्चित छन् ।
- उत्तरी गोरखाका चुमनुब्री र धार्चे गाउँपालिकाका धेरै बस्ती एक महिनादेखि विद्युत्विहीन छन्।
- सामागाउँ, साम्दो, रुन्चेत, केरौंजा, जगत, सल्लेरी र भालुवनका करिब १ हजारभन्दा बढी घरधुरी प्रभावित।
१०० किलोवाट क्षमताको सामागाउँ लघुजलविद्युत् आयोजनाको टर्बाइन फुटेर सामागाउँ र साम्दोका गाउँबस्ती विद्युत् सेवाविहीन भएको उपभोक्ता समितिका अध्यक्ष वीरबहादुर लामाले जानकारी दिए । ‘आयोजना निर्माण भएको पाँच वर्ष भयो । अहिले टर्बाइन फुटेर विद्युत् उत्पादन बन्द भएको छ’, लामाले भने, ‘चार लाख खर्च गरेर हेलिकोप्टरमा झुन्ड्याएर काठमाडौं ल्याइयो, तर नेपालमा बन्न सकेन । इन्डियाबाट सामान ल्याउनुपर्ने रहेछ । अब मर्मत गरेर फेरि हेलिकोप्टरमै झुन्ड्याएर लैजानु पर्छ । त्यसका लागि ६÷७ लाख लाग्छ ।’ तर कहिले बन्छ भन्ने निश्चित नभएको उनको भनाइ छ ।
१०० किलोवाट क्षमताकै रुञ्चेतखोला जलविद्युत् आयोजनाको टर्बाइनमा आएको खराबी अझै समाधान हुन सकेको छैन । आयोजना मर्मतसम्भार हुन नसक्दा रुञ्चेतका २५२ र केरौंजाका गरी करिब सात सय घरधुरीका बासिन्दा टुकीकै भरमा बस्नु परेको स्थानीय दीपेन्द्र गुरुङको भनाइ छ । सो टर्बाइन मर्मतका लागि पनि भारतबाट सामान ल्याउनुपर्ने भएकाले मर्मतसम्भार हुन नसकेको गुरुङले बताए । विद्युत् सेवा अवरुद्ध हुँदा गाउँका बासिन्दाले मोबाइल चार्जसमेत गर्न पाएका छैनन् ।
त्यस्तै ३५ किलोवाटको जगत जलविद्युत् आयोजनाको पनि टर्बाइनमा खराबी आएका कारण चुमनुब्री गाउँपालिका—३ को जगत, सल्लेरी, भालुवनका ७२ घरधुरीका बासिन्दा विद्युत् सेवाबाट वञ्चित भएका छन् । विगत एक महिनादेखि गाउँलेहरू विद्युत् उपभोग गर्नबाट वञ्चित भएका स्थानीय गणेश कार्कीले जानकारी दिए । सो टर्बाइन पनि भारत लगेरै बनाउनुपर्ने भएकाले ढिलो भएको उनको भनाइ छ ।
प्रतिक्रिया दिनुहोस !
