महेन्द्रनगर : कञ्चनपुरको भीमदत्त नगरपालिका–९ ब्रह्मदेवस्थित सामान्य परिवारमा हुर्किएका २३ वर्षीय दिनेश नायक परिवारको आर्थिक अवस्था सुधार्ने उज्यालो भविष्यको सपना बोकेर २०८० असारमा अध्ययन भिसामा रुस उडे।
दिनेशका बुबा कर्णसिंह नायकका अनुसार दिनेश २०८० असार ८ गते घरबाट रुसका लागि बिदा भएका थिए। काठमाडौंंको एक साता बसाइपछि रुस उडे। रुस पुगेपछि कलेजमा भर्ना पनि भएका थिए। होस्टेलमा बस्ने गरेका उनी बिदाको समय मिलाएर काम पनि गर्न थालेका थिए। ‘होस्टेलमा बसेको एक महिनापछि भदौमा छोराले रुसी सेनामा भर्ना भएँ भनेर फोन गरेको थियो।’ दिनेशका बुबा कर्णले भने, ‘युद्धमा जान्थ्यो कहिले दश दिन कहिले एक हप्तामा फर्केर आएपछि फोन गथ्र्यो।’ कात्तिकको अन्तिमतिर बुबालाई फोन गरेर एक लाख नेपाली तलब पाएको र ७३ हजार खातामा पठाउँको बताएका थिए। ‘मलाई ७३ हजार तपाईंको खतामा पठाउँ बाँकी मेरो खर्च राखे भनेर फोन गरेको थियो।’ उनले भने, ‘त्यसपछि अन्तिमपटक मंसिर १० गते छोरासँग सम्पर्क भएको थियो, त्यसपछि सम्पर्क भएको छैन।’
छोराले रुसी सेनामा भर्ना भएको जानकारी गराएदेखि परिवार चिन्तामा थियो। दिनेशलाई घर फर्किन परिवारले सम्झाइबुझाइ गरे पनि उनले मानेनन्। दिनेश रुसी सेनामा गएपछि दुई÷तीनपटक कुराकानी भएको उनकी भाउजू भागरथी नायकले बताइन्। ‘उनीसँगै गएका रोहन नायक पनि रुसी सेनामा गएका थिए उनी घर फर्किएर अहिले रोजगारीका लागि दुबईमा छन्।’ उनले भनिन्, ‘मंसिर १० गते राति २ बजेको भ्वाइस म्यासेज छ, त्यसपछि
दुई वर्षदेखि छोरासँगको सम्पर्क टुटेपछि उनको परिवार पीडामा छ। दिनेशकी आमाबुबा विक्षिप्त छन्। ‘युद्धमा आज वा भोलि कहिले लग्छन् भनेको भ्वाइस म्यासेज उनकी भाउजूको फोनमा छ।’ दिनेशकी आमा कमलादेवीले भावुक हुँदै भनिन्, ‘फोन लग्न दिँदैन अफिसमै हुन्छ, फिर्ता आएपछि फोन गर्छु मेरो चिन्ता नगर्नु भनेको थियो।’
परिवारले दुई वर्षयता दिनेशको अवस्था थाहा पाउन सकेको छैन। पढाइका लागि भनेर ऋण खोजेर विदेश पठाउँको छोरा सम्पर्कविहीन भएपछि परिवार एकातिर छोराको र अर्कोतिर ऋण तिर्ने चिन्तामा छ। छोराको खोजीका लागि परराष्ट्र मन्त्रालयमा निवेदन दिएका छन्। परराष्ट्र मन्त्रालयले नेपाली दूतावासलाई दिनेशलाई नेपाल फिर्ता पठाउँन आवश्यक पहल गरिदिन २०८१ साउन १४ गते नेपाली दूतावासलाई पत्राचार गरेको छ। तर, अहिलेसम्म थप जानकारी परिवारले पाउन सकेको छैन।
प्रतिक्रिया दिनुहोस !
