राष्ट्रिय सभा निर्वाचन  : लुम्बिनीमा तीन पदका लागि ८ जना प्रतिस्पर्धामा

दाङ : राष्ट्रिय सभा निर्वाचनमा लुम्बिनीबाट तीन सदयका लागि मतदान सुरु भएको छ । घोराहीस्थित कर्मचारी मिलन केन्द्रमा मुख्यमन्त्री चेतनारायण आचार्यले पहिलो मत खसाल्दै मतदानको शुभारम्भ गरेका हुन् । 

लुम्बिनीमा तीन सिटका लागि हुने निर्वाचनमा ८ जना उम्मेदवार प्रतिस्पर्धामा रहेका छन् । नेपाली कांग्रेस, नेकपा एमालेले संयुक्त उम्मेदवार खडा गरेका छन् ।  कांग्रेस–एमाले गठबन्धनबाट तीन, नेपाली कम्युनिष्ट पार्टीबाट तीन र राष्ट्रिय जनमोर्चाबाट दुई जनाको उम्मेदवारी दर्ता गरेका छन् । लुम्बिनी प्रदेशबाट महिला, अपांगता–अल्पसंख्यक र अन्य गरी तीन सदस्य निर्वाचित हुँदैछन् । 

कांग्रेसबाट अपांग कोटामा लमही नगरपालिक–३, दाङका बासुदेव घिमिरे र अन्य कोटामा रेसुङ्गा नगरपालिका–३ गुल्मीका चन्द्र बहादुर केसीले उम्मेदवारी दर्ता गरेका छन् । महिलामा एमालेबाट रामकुमारी झाँक्रीको उम्मेदवारी परेको छ ।

यसैगरी नेपाली कम्युनिष्ट पार्टीले पनि तीनवटै सदस्यमा मनोनयन दर्ता गराएको छ । महिला कोटाबाट बराङ्दी गाउँपालिका–१ पाल्पाकी दुर्गा कुमारी भण्डारी, अपांगमा बैजनाथ गाउँपालिका–५ बाँकेका सर्जन बिक र अन्यमा बर्दघाट नगरपालिका–१४ नवलपरासी (बर्दघाट सुस्ता पश्चिम) का बृहस्पति अधिकारीले उम्मेदवारी दिएका छन् । राष्ट्रिय जनमोर्चाले महिला र अन्य कोटामा उम्मेदवारी दर्ता गरेको छ ।

महिलामा प्युठान नगरपालिका–८ प्युठानकी पद्मा पण्डित र अन्यमा मल्लरानी गाउँपालिका–२, प्युठानका बोम बहादुर खत्रीले मनोनयन दर्ता गरेका छन् । लुम्बिनी प्रदेशमा ८७ प्रदेशसभा सदस्य (हाल ८३) र २ सय १७ स्थानीय तहका प्रमुख उपप्रमुख गरी ३ सय मतदाता रहेको निर्वाचन अधिकृत प्रकाशप्रसाद पण्डितले बताए । मतदान बिहान ९ बजे देखि ३ बजे सम्म रहेको छ ।

कुन दलको मतभार कस्तो छ ?
लुम्बिनी प्रदेशमा प्रदेश सभा र स्थानीय तहगरी कुल ८५४१ मतभार छ । विगतमा प्रदेश सभा सदस्यको मतभार ४८ रहेकोमा अहिले वृद्धि गरेर ५३ पुर्‍याएको छ । यस्तै स्थानीय तहका प्रमुख उपप्रमुखको मतभार १८ बाट बढेर १९ पुगेको छ ।

लुम्बिनी प्रदेश सभामा ८७ सदस्य छन्, यसमा ४ जनाले राजीनामा दिएर प्रतिनिधि सभा सदस्यमा उम्मेदवार बनेका छन। प्रदेश सदस्यको  मतभार ४६८१ रहेको मा ४ संख्या कम हुँदा २१२ मत कम हुने छ । भने प्रदेशमा रहेका १०९ स्थानीय तहका प्रमुख र उपप्रमुख गरी २१८ जनाको मतभार ४१४२ रहन्छ । यस हिसाबले राष्ट्रिय सभा निर्वाचनमा लुम्बिनी प्रदेशअन्तर्गत सबैभन्दा धेरै मतभार नेपाली कांग्रेसको ३१७९ रहन्छ । यस्तै, एमालेको २८१० र साविक माओवादीको १२३७ छ । साविक माओवादी केन्द्र र एकीकृत समाजवादीसहितका दल मिलेर नेपाली कम्युनिस्ट पार्टी गठन भइसकेको अवस्थामा प्रदेश सभामा एकीकृत समाजवादीका एक सांसदको मतभार पनि १२३७ मा थप हुने देखिन्छ ।

साना दलमध्ये राप्रपाको २६९ मतभार छ भने नागरिक उन्मुक्ति पार्टीको १५९ जसपाको २७३, लोसपाको १८७, जनमतको १५९, राजमोको १२९, जनता प्रगतिशील पार्टीको ३८ र स्वतन्त्र ५३ मतभार छ ।