राष्ट्रियसभा निर्वाचन : मधेश प्रदेशमा दुई सय बढी मतदाताले गरे मतदान
माघ ११, २०८२ आइतबार १२:५४:४
जनकपुरधाम : राष्ट्रिय सभा सदस्य निर्वाचन अन्तर्गत हालसम्म मधेस प्रदेशमा दुई सय बढीले मतदान गरेका छन् । निर्वाचन अधिकृत शुभाषबाबु पुरीका हालसम्म १२० जना स्थानीय तहका प्रमुख तथा उपप्रमुख र ८० जना प्रदेशसभा सदस्यले मतदान गरेका छन् ।
मधेस प्रदेशमा चार समूहको चार सिटका लागि मतदान हुँदैछ । बिहान १० बजेदेखि दिउँसो ३ बजेसम्म हुने मतदानमा १ सय जना प्रदेशसभा सदस्य र २६४ जना स्थानीय तहका प्रमुख–उपप्रमुख मतदाता छन् ।
मधेस प्रदेशमा चार सिटका लागि ११ जना उम्मेदवार रहेकोमा तीन जनालाई जनता समाजवादी पार्टी (जसपा) नेपालले निस्क्रिय पारेको हो । नेपाली कम्युनिष्ट पार्टी (नेकपा) ले एक्लै सबै सिटमा उम्मेदवारी दर्ता गराएको छ भने नेकपा एमाले,नेपाली कांग्रेस र जसपा नेपालले गठबन्धन गरेर उम्मेदवार खडा गरेको हो ।
जनमत पार्टीले आफ्नो उम्मेदवार खडा गरेको छैन् । मधेस प्रदेशमा अन्य,महिला,दलित र अपांगता अल्पसंख्यक समूहमा निर्वाचन हुँदैछ । अन्य समूहमा लोकतान्त्रिक समाजवादी पार्टी नेपालका महन्थ ठाकुर र नेकपाका लक्ष्मण पौडेल उम्मेदवार छन्।
उम्मेदवारी अघि लोसपा र जसपा नेपालबीच एकता गर्ने निर्णय मात्र भएकोमा हाल दुबै पार्टीबीच एकता भइसकेको छ । यस्तै, महिला समूहमा जसपा नेपालकी चन्द्रकला देवी साह, नेकपा एमालेकी रेखा कुमारी झा र नेकपाकी शमी कुमारी अग्रवाल उम्मेदवार रहेका छन्।
दलित समूहमा जसपा नेपालकी चमेली देवी दास, नेपाली कांग्रेसका धर्मेन्द्र पासवान र नेकपाका शम्भु पासवान हजारी उम्मेदवार छन्। अपाङ्गता भएका व्यक्ति वा अल्पसंख्यक समुदाय समूहमा नेकपाका रामनन्दन प्रसाद, नेपाली कांग्रेसका रञ्जित कर्ण र जसपा नेपालका शैलेश कुमार चौधरी उम्मेदवार छन्।
प्रतिक्रिया दिनुहोस !
