काठमाडौं : चालु आर्थिक वर्षको माघ मसान्तसम्म ६ खर्ब ६९ अर्ब रुपैयाँ राजस्व संकलन भएको छ। सरकारको खर्च गर्ने आम्दानीको स्रोतका रूपमा राजस्व संकलनलाई लिइन्छ। समीक्षा अवधिमा राजस्व संकलनको लक्ष्य ८ खर्ब १३ अर्ब रुपैयाँ रहेको थियो।
साउनदेखि माघसम्मको लक्ष्यको तुलनामा भने ८२.२६ प्रतिशत राजस्व संकलन भएको छ। अर्थमन्त्रालयले शुक्रबार सार्वजनिक गरेको तथ्यांक नुसार समीक्षा महिनामा वार्षिक लक्ष्यको तुलनामा ४५.२२ प्रतिशत राजस्व संकलन भएको हो।
अघिल्लो आर्थिक वर्षको यसै अवधिको तुलनामा राजस्व वृद्धिदर २.८३ प्रतिशत रहेको छ। अघिल्लो वर्ष माघसम्म ६ खर्ब ५० अर्ब रुपैयाँ राजस्व संकलन भएको थियो। सरकारको चालु आर्थिक वर्षको राजस्व संकलनको वार्षिक लक्ष्य १४ खर्ब ८० अर्ब रुपैयाँ छ।
समीक्षा अवधिमा शिक्षासेवा शुल्क र अन्यबाट लक्ष्यको १२५.७२ प्रतिशत अर्थात् ३ अर्ब ४४ करोड रुपैयाँ संकलन भएको छ। यस शीर्षकबाट राजस्व संकलनको लक्ष्य २ अर्ब ७४ करोड रुपैयाँ थियो। अघिल्लो वर्षको तुलनामा वृद्धिदर ६१.०७ प्रतिशत रहेको छ।
यस्तै, अन्तशुल्कबाट समीक्षा अवधिमा लक्ष्यको ९०.९० प्रतिशत अर्थात् १ खर्ब ५ अर्ब रुपैयाँ संकलन भएको छ। यस शीर्षकमा राजस्व उठाउने लक्ष्य १ खर्ब १५ अर्ब थियो। मूल्य अभिवृद्धिकरबाट पनि लक्ष्यको ९०.४४ प्र्रतिशत अर्थात् १ खर्ब ९६ अर्ब रुपैयाँ राजस्व उठेको छ। अघिल्लो वर्षको तुलनामा
७.५८ प्रतिशत बढिले यस शीर्षकबाट राजस्व
उठेको छ। समीक्षा अवधिमा भन्सारबाट १ खर्ब ३५ अर्ब रुपैयाँ राजस्व उठेको छ। जबकि यस अवधिमा संकलन लक्ष्य १ खर्ब ७० अर्ब रुपैयाँ थियो।
चालु आर्थिक वर्षको ७ महिनामा आयकरबाट १ खर्ब ५८ अर्ब रुपैयाँ (लक्ष्यको ७२.१० प्रतिशत) राजस्व उठेको छ। सरकारको लक्ष्य भने २ खर्ब २० अर्ब संकलन गर्ने थियो। अघिल्लो वर्षको सोही अवधिको तुलनामा आयकर संकलन भने ०.८१ प्रतिशतले घटेको अर्थको तथ्यांक छ। गैरकर राजस्वमा पनि अघिल्लो वर्षको यसै अवधिको तुलनामा १४.८९ प्रतिशतले घटेको छ।
विभागगत परिचालनका आधारमा पनि राजस्व संकलनको लक्ष्य प्राप्ति भएको देखिँदैन। भन्सार विभागले माघ मसान्तसम्म आफ्नो लक्ष्यको ८३.८४ प्रतिशत अर्थात् २ खर्ब ७८ अर्ब रुपैयाँ संकलन गरेको छ। आन्तरिक राजस्व विभागले सोही अवधिसम्मको लक्ष्यको ८१.३६ प्रतिशत अर्थात् ३ खर्ब २० अर्ब रुपैयाँ राजस्व उठाएको छ। समग्रमा, राजस्व व्यवस्थापन सूचना प्रणालीको तथ्यांक अनुसार सरकारले माघ महिनासम्मको कुल लक्ष्यको ८१.७४ प्रतिशत प्रगति हासिल गरेको छ। अघिल्लो वर्षको यसै अवधिसँग तुलना गर्दा विभागीय रूपमा राजस्व संकलन ३.४५ प्रतिशतले वृद्धि देखिन्छ।
प्रतिक्रिया दिनुहोस !
