एलनको ऐतिहासिक शतकमा दक्षिण अफ्रिकालाई हराउँदै न्युजिल्यान्ड विश्वकपको फाइनलमा
फागुन २१, २०८२ बिहीबार ६:१:१०
काठमाडौं : प्रतियोगिता अवधिभर अपराजित रहेको दक्षिण अफ्रिकालाई ९ विकेटले पराजित गर्दै न्युजिल्यान्ड विश्वकप २०२६ को फाइनलमा प्रवेश गरेको छ।
आइसिसी टी२० विश्वकप २०२६ को पहिलो सेमिफाइनल खेलमा प्रतियोगिता अवधिभर अपराजित रहेको दक्षिण अफ्रिकालाई फराकिलो अन्तरले पराजित गर्दै न्युजिल्यान्ड दोस्रोपटक टी २० विश्वकपको फाइनलमा पुगेको हो। सन् २०२१ मा न्युजिल्याण्डले टी २० विश्वकपको फाइनल खेलेको थियो। सन् २०२४ को विश्वकपको फाइनल खेलेको टोली दक्षिण अफ्रिका भने सेमीफाइनलबाट आफ्नो यात्रा टुङ्ग्याएको छ।
इ
न्युजिल्यान्डको जितमा ओपनर ब्याटर फिन एलनले ऐतिहासिक शतकीय पारी खेले। फिनले टी२० विश्वकपकै सबैभन्दा छिटो शतक बनाउने खेलाडी बने। उनले ३३ बलमा १० चौका र आठ छक्का सहित शतक पूरा गर्दै अविजित रहे। उनले बपहिलो विकेटका लागि ओपनर ब्याटर टिम सेफर्ड सँग ११७ रनको शतकीय साझेदारी सहित न्युजिल्यान्डको जितको धरोहर तय गरेका थिए। सेफर्डले ३३ बलमा सात चौका र दुई छक्का सहित ५८ रनको अर्धशतकीय पारी खेलेका थिए। रचिन रविन्द्र ११ बलमा दुई चौका सहित १३ रनमा अविजित रहे। दक्षिण अफ्रिकाको लागि बलिङतर्फ एकमात्र विकेट कागिसो रावडाले लिए।
त्यसअघि,ब्याटिङ गरेको दक्षिण अफ्रिकाका लागि मार्को ज्यानसनले सर्वाधिक ५५ रनको अविजित अर्धशतकीय पारी खेले। उनले ३० बलमा दुई चौका र पाँच छक्का प्रहार गरे। उनले छैठौँ विकेटका लागि त्रिस्टन स्टुप्ससँग ७३ को साझेदारी गर्दै धरापमा परेको दक्षिण अफ्रिकाको इनिङ सम्हाले। ७७ मा ५ विकेट गुमाएको दक्षिण अफ्रिकाको लागि ओपनरद्वय यही कप्तान एडन मक्रम र क्विन्टन डि ककले क्रमश १८ र १० रन बनाए। डेवाल्ड ब्रेभिसले ३४ रन बनाए। त्रिस्टन स्टुप्सले २९ रनमा पेभेलियन फर्किए।
न्युजिल्यान्डका लागि बलिङतर्फ म्याट हेन्री र कोल एमसीकोन्ची र रचिन रविन्द्रले समान २-२ विकेट लिए। लोकी फर्गुसन र जिम्मी नीसमले १-१ विकेट लिए।
विश्वकप २०२६ को दोस्रो सेमीफाइनल खेलमा ५ मार्चमा भारत र इङ्ल्यान्डले खेल्दैछन्। दोस्रो सेमीफाइनल खेल मुम्बईको वानखेडे क्रिकेट स्टेडियममा हुनेछ।यो खेलको विजयी टोलीले न्युजिल्यान्डसँग टी २० विश्वकप २०२६ को उपाधिका लागि खेल्नेछ। फाइनल खेल गुजरातको अहमदाबादस्थित नरेन्द्र मोदी स्टेडियममा फागुनको २४ गते हुनेछ।
प्रतिक्रिया दिनुहोस !
