काठमाडौं : टी–२० विश्वकप २०२६ सकियो । श्रीलंका र भारतमा संयुक्त रुपमा आयोजना भएको विश्वकपमा २० राष्ट्रले प्रतिष्पर्धा गरेका थिए । जसमा ११ टेष्ट राष्ट्र र ९ वटा एशोसियट राष्ट्र रहेका थिए । विश्वकप २०२६ मा कुल सात शतक बने । जसमा पाकिस्तानका ओपनर ब्याटर साहिबजादा फरहानले २ शतक बनाए । उनी २ शतक प्रहार गर्ने एक मात्र खेलाडी बने ।
विश्वकप–२०२६ मा ह्यारी ब्रुकले शतक प्रहार गर्दै टी–२० विश्वकपमा शतक प्रहार गर्ने एक मात्र कप्तानको रुपमा आफ्नो नाम दर्ता गरे । २०२६ को उपाधि विजेता भारतीय टिमबाट भने कुनै पनि खेलाडीले शतक बनाउन सकेनन् । शतक बनाउने ६ खेलाडीमा पाँच खेलाडी टेष्ट राष्ट्रका हुन् । ९ एशोसियट राष्ट्रमध्ये क्यानडाका युवा ब्याटर युवराजसिंह समराले शतक प्रहार गरे । १९ वर्षीय युवराज विश्वकपमा शतक बनाउने सबैभन्दा कान्छो खेलाडी बने ।
इङ्ल्याण्डका २ ब्याटरले शतकीय पारी खेले । शतक बनाउने खेलाडीको सूचीमा इङ्ल्याण्ड अग्रस्थानमा रह्यो । तर टिम भने सेमिफाइनलबाट बाहिरियो । पाकिस्तान, न्यूजिल्याण्ड, श्रीलंका र क्यानडाका १÷१ खेलाडीले शतक बनाए । जसमा न्यूजिल्याण्डले फाइनलसम्मको यात्रा तय गर्यो । पाकिस्तान र श्रीलंका सुपर ८ सम्म पुगे । शतक बनाउने खेलाडीको लिस्टमा अटेको तर समूह चरणबाट माथि क्यानडाको टिम भने अटाउन सकेन ।
साहिबजादा फरहान (पाकिस्तान)
पाकिस्तानका ओपनर ब्याटर साहिबजादा फरहानले २०२६ को विश्वकपमा सर्वाधिक रन बनाउने खेलाडीमा उनको नाम शीर्ष स्थानमा रह्यो । सुपर ८ बाट आफ्नो यात्रा सकाएको पाकिस्तानका लागि उनले अन्तिम खेलमा श्रीलंकाविरुद्ध र समूह चरणमा नामिबियाविरुद्ध शतकीय अविजित पारी खेले । २०२६ को विश्वकपमा २ शतक प्रहार गर्ने उनी एक मात्र खेलाडी हुन् ।
उनले पहिलो शतक समूह ‘ए’ अन्तर्गत नामिबियाविरुद्ध ५८ बलमा ११ चौका र ४ छक्कासहित शतक पूरा गर्दै अविजित रहे । दोस्रो शतक उनले सुपर ८ मा श्रीलंकाविरुद्धको खेलमा हानेका थिए । उनले उक्त खेलमा ६० बलमा ९ चौका र ५ छक्कासहित शतक पूरा गरेका हुन् । उनले प्रतियोगिता अवधिभर २ शतक र २ अर्धशतकीय पारी खेलेका थिए । उनले ६ इनिङ्समा ३८३ रन बनाएका हुन् ।
युवराजसिंह समरा (क्यानडा)
क्यानडाका युवा ब्याटर युवाराजसिंह समराले टी–२० विश्वकपमा शतक प्रहार गरे । १९ वर्षीय युवराज टी–२० विश्वकपमा शतक प्रहार गर्ने सबैभन्दा कान्छा खेलाडी बने । उनले समूह चरणमा न्यूजिल्याण्डविरुद्ध ११० रनको शतकीय पारी खेले । उनले ६५ बलमा ११ चौका र ६ छक्का प्रहार गर्दै क्याच आउट भएका थिए । उनको नाम २०२६ विश्वकपमा एशोसियट राष्ट्रबाट शतक प्रहार गर्ने एक मात्र खेलाडीको रुपमा रह्यो । क्यानडा समूह चरणबाटै बाहिरिए पनि उनको नाम भने विश्वकपको इतिहासमा रह्यो ।
उनी समग्रमा टी–२० अन्तर्राष्ट्रियमा शतक प्रहार गर्ने युवा खेलाडीमा तेस्रो स्थानमा रहेका छन् । फ्रान्सका गुत्सव म्याकअनले १८ वर्षको उमेर आइसीसी टी–२० विश्वकप सब रिजनल युरोप क्वालिफार्यस समूह ‘बी’ मा स्विटजरल्याण्डविरुद्ध शतक प्रहार गरेका थिए । दोस्रो स्थानमा नाइजेरियाका खेलाडी सेलिम सलाउ रहेका छन् । उनले पनि आइसीसी विश्वकप सब रिजनल अफ्रिका क्वालिफार्यसको समूह ‘सी’ मा आइभोरी कोस्टासँग शतक प्रहार गरेका थिए ।
फिन एलेन (न्यूजिल्याण्ड)
न्यूजिल्याण्डका ओपनर ब्याटर फिन एलेनले विश्वकप २०२६ मा १ शतक र १ अर्धशतक प्रहार गरेका छन् । उनले पहिलो सेमिफाइनलमा दक्षिण अफ्रिकाविरुद्ध शतकीय पारी खेलेका हुन् । उनले ३३ बलमा १० चौका र ८ छक्कासहित शतक पूरा गर्दै अविजित रहे ।
दक्षिण अफ्रिकाले दिएको १७० को लक्ष्य पछ्याएको न्यूजिल्याण्डले १ विकेटको क्षतिमा १७३ रन बनाउँदै फाइनल प्रवेश गरेको थियो । महत्वपूर्ण खेलमा फिनले टिमको आवश्यकता अनुसार खेले । उनको महत्वपूर्ण पारीको सहयोगमा न्यूजिल्याण्डले दोस्रो पटक टी–२० विश्वकपको फाइनलमा स्थान बनाएको थियो । उनले ८ इनिङ्समा १ शतक र १ अर्धशतकको सहयोगमा २९८ रन बनाए ।
ज्याकोब बेथेल (इङ्ल्याण्ड)
इङ्ल्याण्डका मध्यक्रमका ब्याटर ज्याकोब बेथेलले पनि २०२६ को विश्वकपमा शतकीय पारी खेले । उनले दोस्रो सेमिफाइनलमा भारतविरुद्ध शतकीय पारी खेलेका हुन् । मुम्बईको वानखेडे स्टेडियममा उनले ४८ बलमा ८ चौका र ७ छक्कासहित १०५ रनको पारी खेलेका हुन् । उनी १०५ रनमा रनआउट भएपछि इङ्ल्याण्डको जितको आधार खोसिएको थियो । ७ रनले भारतसँग सेमिफाइनलमा पराजित हुँदै इङ्ल्याण्डले २०२६ को विश्वकप सकेको थियो । बेथेलले ८ इनिङ्समा १ शतक र १ अर्धशतकसहित २८० रन बनाए ।
ह्यारी ब्रुक (इङ्ल्याण्ड)
इङ्ल्याण्डका कप्तान ह्यारी ब्रुकले विश्वकप २०२६ मा शतकीय पारी खेले । उनी टी–२० विश्वकपमा शतक प्रहार गर्ने पहिलो कप्तान बने। उनले पाकिस्तानविरुद्ध पाल्लेकेले स्टेडियममा वान डाउन आएका ह्यारी ब्रुकले ५१ बलमा १० चौका र ४ चौकासहित शतक पूरा गरेका हुन् । उनको सम्हालिएको शतकीय पारीको सहयोगमा इङ्ल्याण्डले पाकिस्तानमाथि २ विकेटको जित दर्ता गर्दै सेमीफाइनलमा स्थान पक्का गरेको थियो । उनले ८ खेलमा ८ इनिङ्स खेल्दै १ शतक र १ अर्धशतकसहित कुल २२८ रन जोडे ।
पाथुम निशंका (श्रीलंका)
श्रीलंकाका ओपनर ब्याटर पाथुम निशंकाको नाम शतक प्रहार गर्ने खेलाडीको सूचीमा छ । उनले समूह ‘बी’ अन्तर्गत समूह चरणको खेलमा अष्ट्रेलियाविरुद्ध शतकीय पारी खेलेका थिए । श्रीलंकाले समूह चरणमा अष्ट्रेलियालाई ८ विकेटले हराएको थियो ।
अष्ट्रेलियाले दिएको १८२ रनको विजयी लक्ष्य पछ्याएको श्रीलंकाको जितमा पाथुमले शतकीय पारी खेलेका थिए । उनले ५२ बलमा १० चौका र ५ छक्कासहित शतक पूरा गरेका हुन् । उनी शतक प्रहार गर्दै अविजित रहेका थिए । घरेलु मैदान पाल्लेकेलेमा श्रीलंकाले अष्ट्रेलियालाई हराउँदा पाथुमको शतकीय पारी टिमले निकै पछिसम्म सम्झने छ ।
प्रतिक्रिया दिनुहोस !
