वीरगन्ज : वर्षा बाधक बनेको खेलमा मधेस प्रदेशले ‘डीएलएस मेथड’ का आधारमा बुधबार गण्डकीमाथि १८ रनको जित हात पारेको छ । प्रधानमन्त्री कप पुरुष राष्ट्रिय क्रिकेट प्रतियोगिता अन्तर्गत वीरगन्जको नारायणी क्रिकेट मैदानमा मधेस र गण्डकीको खेल वर्षाले प्रभावित बनेको हो ।
मधेसले प्रस्तुत गरेको १७३ रनको लक्ष्य पछ्याएको गण्डकीले २२ ओभरमा पाँच विकेट गुमाएर ८० रन बनाएको थियो । गण्डकीले ब्याटिङ गरिरहेका बेला सुरु भएको वर्षा नरोकिएपछि डिएलएस मेथडका आधारमा मधेस बिजयी भएको हो । गण्डकीका ओपनर अर्जुन कुमालले अविजित ४९ रन बनाए ।
दीपक डुम्रेले १३ रन जोड्दा अन्य ब्याटरले दोहोरो अंकमा रन जोड्न सकेनन् । मधेसका विशाल पटेल, रञ्जित कुमार, आशिक बैठा र आदिल आलमले एक÷एक विकेट लिए । वर्षाका कारण ३५ ओभरमा झारिएको खेलमा टस हारेर ब्याटिङ गरेको मधेसले ३४.५ ओभरमा सबै विकेट गुमाएर १७२ रन बनाएको थियो ।
मधेसका लागि ओपनर मयन यादवले ४३ र प्लेयर अफ दि म्याच विशाल सुस्लिङले ४० रन बनाए । कप्तान अनिल साहले ३६, विशाल पटेलले १८ र पवन सर्राफले ११ रन जोडे । मधेसका तीन ब्याटर डकआउट हुँदा तीन ब्याटरले दोहोरो अंकमा रन जोड्न सकेनन् ।
गण्डकीका सुभाष भण्डारी र अप्राजित पौडेलले तीन / तीन विकेट लिए । अंकित न्यौपाने, क्रिविन श्रेष्ठ, कमल परियार र सन्देश पन्थीले एक / एक विकेट हात पारे । जितसँगै मधेस तालिकाको तेस्रो स्थानमा उक्लिएको छ । ६ खेलबाट मधेसले ९ अंक बटुलेको छ । गण्डकी भने आठौं स्थानमा छ । गण्डकीले सात खेलबाट पाँच अंक प्राप्त गरेको छ ।
प्रतिक्रिया दिनुहोस !
