धादिङ : धादिङको बेनीघाट रोराङ गाउँपालिका–९ मैवाङका इस्तराम प्रजाको परिवारका लागि बुधबार केवल घर सर्ने दिन मात्र थिएन, त्यो दिन उनीहरूको जीवनकै ठूलो मोड थियो । पुस्तौंदेखि ओडारमा बस्दै आएको यो परिवार पहिलो पटक आफ्नै छानोमुनि सुरक्षित रूपमा बस्न पाएको छ ।
ढुङ्गामुनिको अँध्यारो र जोखिमपूर्ण जीवन उनीहरूको दैनिकी बनिसकेको थियो । वर्षात्, चिसो र असुरक्षाबीच दुई पुस्ताले बिताएको त्यो संघर्ष सहज थिएन । राज्यले प्रत्याभूत गरेको आधारभूत अधिकार आवास उनीहरूको पहुँचभन्दा धेरै टाढा थियो ।
तर, चैत ९ गते विभिन्न सञ्चारमाध्यममा उनीहरूको कथा बाहिरिएपछि परिस्थितिले मोड लियो । एक समाचारले समाज र सरोकारवालाको ध्यान तान्यो र त्यही ध्यानले परिवर्तनको ढोका खोलिदियो । काठमाडौंका तुलसी श्रेष्ठले घर बनाउन दुई रोपनी जग्गा उपलब्ध गराए । त्यसपछि नेपाली सेनाको भैरव गणका २० जना सुरक्षाकर्मी खटिए । विभिन्न संघसंस्थाको सहयोगले यो पहल अझ मजबुत बन्यो ।
घर मात्र होइन, इस्तराम दम्पतीको पहिचान पनि सुनिश्चित भयो । नागरिकता नहुँदा सामाजिक सुरक्षा भत्ताबाट वञ्चित उनीहरूलाई जिल्ला प्रशासन कार्यालय धादिङले ओडारमै पुगेर नागरिकता प्रदान गर्यो। त्यो क्षण उनीहरूको लागि राज्यसँग जोडिने पहिलो औपचारिक ढोका थियो ।
नेपालको संविधानको धारा ३७ ले प्रत्येक नागरिकलाई आवासको अधिकार सुनिश्चित गरेको छ । तर, व्यवहारमा त्यो अधिकार सबैसम्म पुगेको छैन भन्ने उदाहरण इस्तरामको परिवार थियो । अहिले भने उनीहरूको जीवनमा त्यो अधिकारले आकार लिएको छ ।
नयाँ घरको ढोकाबाट भित्रिँदा इस्तराम परिवारका अनुहारमा देखिएको खुशी केवल व्यक्तिगत उपलब्धि होइन, त्यो सामूहिक प्रयास र मानवियताको जीत हो । अब उनीहरूका लागि भविष्य केवल बाँच्ने संघर्ष होइन, सपनाहरू बुन्ने अवसर पनि बनेको छ ।
प्रतिक्रिया दिनुहोस !
