भोजपुर : पञ्चकन्या देवी मन्दिर निर्माणका लागि पौवादुङमा गाउँपालिका–३, च्याङ्ग्रेमा विराट ज्ञानमहायज्ञ तथा पौवादुङमा सांस्कृतिक महोत्सव २०८३ आयोजना गरिने भएको छ । वैशाख ९ गतेदेखि १८ गतेसम्म सञ्चालन हुने महायज्ञका लागि जनस्तरबाटै आर्थिक सहयोग संकलन गरिने आयोजकले जनाएको छ ।
गाउँपालिकाले महायज्ञलाई धार्मिक, सांस्कृतिक र पर्यटन प्रवर्द्धनसँग जोडिएको अभियानको रूपमा लिएको जनाएको छ । महोत्सव अवधिभर पञ्चकन्या देवीको महायज्ञ हवन, पूजाआरती, नित्यपुजा, झाँकीसहितको कथावाचन, योग तथा स्वास्थ्य शिविरलगायत विविध धार्मिक तथा सांस्कृतिक कार्यक्रम सञ्चालन गरिनेछ । महायज्ञमा सहभागी श्रद्धालुहरूले श्रीमद्देवी भागवत महापुराण नवाह धनधान्याञ्चल, गौदान, पितृतर्पण, चण्डीपाठ, तुलादान तथा सामूहिक भजन जस्ता धार्मिक कार्यमार्फत पुण्य आर्जन गर्न सक्ने व्यवस्था मिलाइएको छ ।
धार्मिक दृष्टिले महत्वपूर्ण मानिएको उक्त मन्दिरको भौतिक पूर्वाधार निर्माणका लागि करिब एक करोड ८३ लाख रुपैयाँ लागत लाग्ने अनुमान गरिएको छ। पुरातात्विक शैलीमा बन्ने मन्दिर गजुरसहितको ३१ फिट ४ इन्च चौडाई तथा ७ फिट ३ इन्च उचाई हुने जनाइएको छ । मन्दिर निर्माणमा सक्दो रूपमा मानव श्रम प्रयोग गरी लागत घटाउने रणनीति अपनाइने गाउँपालिका अध्यक्ष किरण राईले बताए ।
महायज्ञ आयोजनाका लागि विभिन्न विषयगत समिति गठन गरिनेछ भने निर्माण सहयोगका लागि स्थानीयबासी, गाउँपालिकाबासी तथा जिल्लाबासीसँगै बाहिरी जिल्लामा बसोबास गर्ने पौवादुङमाबासीलाई समेत परिचालन गरिने तयारी छ । यसका लागि झापा, मोरङ, सुनसरी र काठमाडौंमा उपसमिति गठन गरिने उनले बताए ।
गाउँपालिकाका प्रमुख प्रशासकीय अधिकृत नवीन भट्टराईले महायज्ञबाट संकलित कुल रकमको ५० प्रतिशत गाउँपालिकाले व्यहोर्ने नीति बनाइएको जानकारी दिए । मन्दिर निर्माणमा गाउँपालिका संरक्षकको भूमिकामा रहने उनले बताए । महायज्ञले धार्मिक पर्यटन प्रबर्द्धन, स्थानीय कला–संस्कृतिको संरक्षण, आर्थिक गतिविधि विस्तार र सामाजिक एकता सुदृढ बनाउन योगदान पुर्याउने विश्वास व्यक्त गरिएको छ ।
मन्दिर निर्माण सम्पन्न भएपछि यहाँको धार्मिक पर्यटन प्रबर्द्धनमा टेवा पुग्ने अपेक्षा लिइएको गाउँपालिका उपप्रमुख ज्योत्सना राईले सुनाइन् । मन्दिर नजिकै रहेको मनमोहक च्याङ्ग्रेपोखरीले आन्तरिक तथा बाह्य पर्यटक आकर्षित गर्ने विश्वास लिइएको छ । मन्दिर निर्माणमा सहयोग गर्ने दाताहरूको वर्गीकृत नामावली प्रकाशन गरिने आयोजकले जनाएको छ । सहयोग रकमका आधारमा स्मारिका, ताम्रपत्र तथा विभिन्न स्तरका स्मारकमा नाम समावेश गरिने व्यवस्था गरिएको छ ।
एक रुपैयाँदेखि ९ सय ९९ रुपैयाँसम्म सहयोग गर्ने दाताहरूको नाम स्मारिका पुस्तकमा, हजारदेखि ४ हजार ९ सय ९९ रुपैयाँसम्म सहयोग गर्नेहरूको नाम ठुलो स्मारिकामा, ५ हजारदेखि २४ हजार ९ सय ९९ रुपैयाँसम्म तथा २५ हजारदेखि ४९ हजार ९ सय ९९ रुपैयाँसम्म सहयोग गर्ने दाताहरूको नाम ताम्रपत्रमा, ५० हजारदेखि ९९ हजार ९ सय ९९ रुपैयाँसम्म सहयोग गर्ने दाताहरूको नामावलीसहित एकल स्मारक तथा एक लाखदेखि १० लाख रुपैयाँसम्म सहयोग गर्ने दाताहरूको नाम ठूलो आकारको स्मारकमा समावेश गरिने व्यवस्था गरिएको आयोजकले जनाएको छ ।
साथै विदेशी दाताबाट प्राप्त सहयोगलाई प्रचलित विनिमय दरअनुसार मूल्यांकन गरी अभिलेखीकरण गरिने गाउँपालिका अध्यक्ष राईले जानकारी दिए । निर्माण सम्पन्नपश्चात ‘च्याङ्ग्रे पोखरी तथा पञ्चकन्या मन्दिर संरक्षण समिति’ मार्फत स्थानीयस्तरमै संरक्षण र व्यवस्थापन गरिने योजना रहेको छ ।
प्रतिक्रिया दिनुहोस !
