भारत : धेरै नेपाली गीतहरुमा समेत आफ्नो जादूमय स्वर दिएकी प्रसिद्ध भारतीय गायिका आशा भोसलेको आइतबार निधन भएको छ । मुम्बईस्थित ब्रिच क्याण्डी हस्पिटलका चिकित्सकहरूले उनको निधनबारे पुष्टि गरेका छन् । उनको अन्त्येष्टि भोलि सोमबार गरिने परिवारले जनाएको छ ।
हृदयाघात (कार्डियाक अरेस्ट) भएपछि शनिबार ९२ वर्षीया उनलाई अस्पताल भर्ना गरिएको थियो । भारतीय संगीत क्षेत्रमा उनी एक ठूलो व्यक्तित्वका रूपमा चिनिन्थिन् र पाश्र्व गायिकाको रूपमा उनले धेरै स्मरणीय गीतहरू दिएकी थिइन् । ‘नया दौर’ देखि ‘तीसरी मंजिल’, ‘हरे रामा हरे कृष्णा’ देखि ‘उमराव जान’ र ‘इजाजत’ हुँदै ‘रंगीला’ सम्म... समय बदलियो, दृश्य बदलियो, पुस्ता बदलियो, पर्दामा नायिकाहरू बदलिए, तर आशाको आवाज सधैं युवा नै रह्यो ।
तर उनको आवाजको चञ्चलता र रमाइला गीतहरूको चर्चा गर्दा, उनको लामो र कठिन संघर्षको कुरा प्रायः कम गरिन्छ । वास्तवमा, आफ्नो असाधारण प्रतिभाका बावजुद पनि आशा भोसले ‘नम्बर दुई’ को स्थानमै सन्तोष मान्नु पर्यो, किनकि हिन्दी फिल्म उद्योगमा ‘नम्बर एक’ मा उनकी आफ्नै महान दिदी लत्ता मंगेशकर थिइन् । भारतीय प्रधानमन्त्री नरेन्द्र मोदीले पनि गायिका आशा भोसलेको स्वास्थ्य अवस्थालाई लिएर चिन्ता व्यक्त गर्दै भगवानसँग स्वास्थ्य लाभको कामना गरेका थिए । एक पारिवारिक स्रोतले बीबीसी न्यूज हिन्दीलाई बताए अनुसार आशा भोसले फोक्सो र उमेरसँग सम्बन्धित अन्य रोगसँग पनि संघर्ष गरिरहेकी छन् ।
८ सेप्टेम्बर १९३३ मा जन्मिएकी आशा भोसलेले १९४३ मा १० वर्षको उमेरमै गाउन सुरु गरेकी थिइन् । उनले ९० वर्षको उमेरसम्म पनि गायन जारी राखिन्। उनले हंसराज बहल, ओपी नैय्यर, मदन मोहन, आरडी बर्मन, इलैयाराजा, अनु मलिकदेखि एआर रहमानसम्मका संगीतकारहरूसँग काम गरेकी छन् ।
उनले मोहम्मद रफी, मुकेश, किशोर कुमारदेखि बॉय जर्ज र आदित्य नारायणसम्मका गायकहरूसँग पनि गीत गाएकी छन् । सन् १९९५ मा उस्ताद अली अकबर खानसँगको एल्बमका लागि उनलाई ग्रामी अवार्डमा नामांकन गरिएको थियो । आशा भोसलेले १०,००० भन्दा बढी गीतहरू रेकर्ड गरेकी छन् । संगीत विश्लेषक राजीव विजयकरले सन् २०२३ मा बीबीसीसँग भनेका थिए, ‘आशा भोसलेको विशेषता भनेको समयसँगै अघि बढ्नु हो । उनले कहिल्यै पुराना चीजहरू मात्र राम्रो हुन्छन् भन्ने मान्यता राखिनन् । उनको आवाज जति भजनमा मिल्छ, त्यति नै क्याबरेमा पनि मिल्छ ।’
उनी भन्छन्, ‘विविधता नै उनको शक्ति हो, जसले उनलाई यहाँसम्म ल्याएको हो । उदाहरणका लागि ‘आगे भी जाने न तू...’ गीत हेर्नुहोस,् यसमा दर्शन पनि छ र यो नाइट क्लब गीत पनि हो । आशाको यस गीतमा एक प्रकारको पीडा छ । नाइट बारमा पनि मिल्ने गरी गीतमा यस्तो भाव ल्याउनु सजिलो हुँदैन, जुन आशा भोसलेले सम्भव बनाइन् ।’ आशा भोसलेले धेरै नेपाली चलचित्रहरुका लागि गीत गाएकी छिन् । उनले मोहनी लाग्ला है, साउने झरीमालगायत धेरै नेपाली गीत गाएर नेपाली स्रोताको मन जितेकी छिन् ।
प्रतिक्रिया दिनुहोस !
