सेयर बजारमा उतारचढाव : नेप्से सामान्य अंकले बढ्यो, कारोबार रकम घट्यो

काठमाडौं : दिनभर उचारचढावमा रहेको नेप्से परिसूचक अन्तिम समयमा आएर एकल अंकले बढेर बन्द भएको छ। साताको दोस्रो सेयर कारोबार दिन मंगलबार नेप्से परिसूचक ८.७८ अंकले बढेर २७१२.८६ विन्दुमा पुगेको हो। अघिल्लो दिन सोमबार नेप्से परिसूचक ३४.६३ अंकले घटेर २७०४.०८विन्दुमा पुगेको थियो।

नेप्से वृद्धि भएपनि कारोबार रकम भने सोमबारको तुलनामा कमी आएको छ। यसदिन ३३५ वटा स्क्रिप्सको ७७ लाख  ३४ हजार  १२ कित्ता सेयर ३ अर्ब ४३ करोड ९० लाख ६८ हजार ३९२ रुपैयाँमा खरिदबिक्री भए। सोमबार ४ अर्ब २६ करोड मुल्य बराबरको सेयर कारोबार भएको थियो।

कारोबारमा आएकामध्ये १६२ वटाच स्टक्सको मूल्य बढ्दा ९० वटाको घट्यो। १६ वटा स्टक्सको मूल्य भने स्थिर रह्यो। अपर लोहोरे खोला हाइड्रोपावरको सेयर ११.१६ प्रतिशतले बढ्दा सोलु हाइड्रोपावरको ७.५६ ,धौलागिरी लघुवित्त वित्तीय संस्थाको ७.०४ प्रतिशतले बढ्यो।

कारोबार रकमका आधारमा सोलु हाइड्रोपावर शीर्षस्थानमा रह्यो। सो कम्पनीले २३ करोड मूल्य बराबरको सेयर कारोबार गर्यो। रिलायन्स स्पिनिङ्ग मिल्सले १२ करोड मूल्य बराबरको सेयर कारोबार गर्दा नेसनल हाइड्रोपावरले ११ करोड,आँखु खोला जलविद्युतले ८ करोड र पाल्पा सिमेन्टले ७ करोड मूल्य बराबरको सेयर कारोबार गर्यो।

सातवटा समूहको उपसूचक बढ्दा बाँकी अरु समूहको उपसूचक नकारात्मक देखिए। डेभलपमेन्ट बैंक,फाइनान्स,होटल्स एण्ड टुरिजम,माइक्रोफाइनान्स,नन लाइफ इन्स्योरे‍न्स र ट्रेडिङ समूहको उपसूचक घट्दा बाँकी अरु समूहको उपसूचक बढेका हुन्।