युक्रेन : युद्धविरामको मुखैमा रूसी ड्रोन र मिसाइल आक्रमणमा युक्रेनमा २७ जनाको ज्यान गएको छ । मस्कोले घोषणा गरेको दुई दिने एक पक्षीय युद्धविराम लागू हुन केही दिन मात्र बाँकी रहेका बेला आक्रमण हुँदा २७ जनाको ज्यान गएको युक्रेनी अधिकारीहरुले बताएका छन् ।
मंगलबार दक्षिणपूर्वी जपोरोझियामा रूसी ग्लाइड बम आक्रमणले कम्तीमा १२ जनाको मृत्यु भएको युक्रेनी अधिकारीले जनाएका छन् । आक्रमणमा एउटा कार मर्मत केन्द्र र आवासीय भवनहरू प्रभावित भएका थिए, जुन यस वर्ष शहरमा भएका सबैभन्दा भीषण आक्रमणमध्ये एक हो ।
क्षेत्रीय गभर्नर इभान फेदोरोभका अनुसार आक्रमणबाट २० जना घाइते भएका छन् । अर्कोतर्फ, उत्तर पूर्वतिरको क्रामाटोस्र्क शहरमा छ जनाको मृत्यु भएको छ भने १२ जना घाइते भएका छन् । यो शहर डोनेट्स्क क्षेत्रमा युक्रेनको नियन्त्रणमा रहेको अन्तिम प्रमुख केन्द्र हो । डिनप्रो शहरमा थप चार जनाको ज्यान गएको छ ।
रूसी आक्रमणले रातभर पोल्टाभा र खार्किभ क्षेत्रमा रहेको युक्रेनको सरकारी ग्यास संरचनाहरूलाई पनि निशाना बनाएको थियो । नाफ्टोगाजका प्रमुख सेर्ही कोरेत्स्कीका अनुसार, यस आक्रमणमा तीन कर्मचारी र दुई उद्धारकर्मीको मृत्यु भएको छ । यस आक्रमणका कारण झण्डै ३,५०० ग्राहकसम्म ग्यास आपूर्ति बन्द भएको छ ।
राष्ट्रपति भोलोदोमिर जेलेन्स्कीले युद्धविराम घोषणा गरेपछि पनि आक्रमण जारी राखेर रूसले निष्ठुरता देखाएको बताएका छन् । यी पूर्ण रूपमा निष्ठुर, निरर्थक र आतंकवादी आक्रमण हुन्, जसको कुनै सैन्य अर्थ छैन’, उनले टेलिग्राममा लेखेका छन्, ‘हाम्रा सहर र गाउँहरूमा यस्ता आक्रमण एक दिन पनि रोकिएका छैनन् ।’ रूसले मे ८ देखि ९ सम्म युद्धविराम घोषणा गरेको थियो, जुन दोस्रो विश्वयुद्धमा नाजी जर्मनीमाथि सोभियत संघको विजयको स्मरण र मस्कोको रेड स्क्वायरमा हुने सैन्य परेडसँग सम्बन्धित छ ।
युक्रेनको वायुसेनाका अनुसार, सोमबार साँझदेखि रूसले ११ वटा ब्यालिस्टिक मिसाइल र १६४ ड्रोन प्रहार गरेको थियो । तीमध्ये एक मिसाइल र १४९ ड्रोन खसालिएको वा निष्क्रिय बनाइएको भए पनि, आठ मिसाइल र १४ ड्रोनले १४ स्थानमा प्रहार गरेका थिए ।
युक्रेनी आक्रमणमा ७ जनाको मृत्यु
उता, रूसद्वारा २०१४ मा कब्जा गरिएको क्रिमिया प्रायद्वीपका प्रमुख सर्गेई अक्स्योनोभले युक्रेनी ड्रोन आक्रमणमा झान्कोई शहरमा पाँच नागरिकको मृत्यु भएको बताएका छन् । रूसको चुभास गणराज्यमा पनि मंगलबार साँझ भएको ड्रोन आक्रमणमा दुई जनाको मृत्यु भएको र कम्तीमा ३२ जना घाइते भएको बताइएको छ ।
प्रतिक्रिया दिनुहोस !
