कैदमा रहेकी इरानी नोबेल शान्ति पुरस्कार विजेता नरगेस जीवन–मृत्युसँग संघर्ष गर्दै

इरान : कैदमा रहेकी इरानी नोबेल शान्ति पुरस्कार विजेता नरगेस मोहम्मदी हृदयघातसम्बन्धी समस्याका कारण जीवन–मृत्युको संघर्षमा छिन् । पाँच दिनदेखि सुरक्षाकर्मीको निगरानीमा अस्पतालमा राखिएकी उनी जीवनका लागि संघर्ष गरिरहेको उनका समर्थकहरूले बताएका छन् ।

उनकी पेरिसस्थित वकिल चिरिन आर्दाकानीले भनेकी छिन्, ‘हामी केवल नरगेसको स्वतन्त्रताका लागि मात्र लडिरहेका छैनौँ, हामी त उनको मुटु धड्किरहोस् भन्नेका लागि लडिरहेका छौं ।’ उनले थपिन्, ‘२०२३ की नोबेल विजेता अहिले ‘जिन्दगी र मृत्युको बीचमा’ छिन् ।’

बिरामी परेकी इरानी नोबेल विजेताको परिवारले जेलमा राखिरहनु नै मृत्यु सजाय सरह भएको बताएका छन् । पेरिसस्थित प्रेस स्वतन्त्रता समूह ‘रिपोर्टर्स विदाउट बोर्डर्स’ का जोनाथन डाघेर (जो उनको समर्थन समितिको सदस्य पनि हुन्) ले भने, ‘हामीले पहिलो पटक उनी जीवन र मृत्युको बीचमा रहेको र मृत्युको जोखिम रहेको कुरा भनिरहेका छौं ।’ उनले थपे, ‘अब ढिला हुनु अघि हामीले कदम चाल्नुपर्छ ।’

५४ वर्षीया मोहम्मदी, जसले पछिल्ला दुई दशकको धेरै समय जेलभित्र–बाहिर बिताएकी छन् । आफ्नो पछिल्लो पटक डिसेम्बरमा एक वकिलको अन्त्येष्टिमा इस्लामिक गणतन्त्रको आलोचना गरेपछि पक्राउ परेकी थिइन् । पहिले नै मुटुसम्बन्धी समस्याबाट पीडित उनी २४ मार्च र १ मेमा उत्तरी इरानको जान्जानस्थित जेलमा दुई पटक हृदयाघात भएको आशंका गरिएको उनका समर्थकहरूले बताएका छन् ।

पछिल्लो घटनापछि उनलाई उपचारका लागि अस्पताल लगिएको भए पनि उनी अझै पनि कडा निगरानीमा राखिएको आर्दाकानीले बताइन् । उनले भनिन्, ‘मोहम्मदीको स्वास्थ्य अवस्था साँच्चै धेरै नै बिग्रिएको छ । हामी नरगेसको जीवनका लागि यति धेरै कहिल्यै डराएका थिएनौँ; उनी कुनै पनि बेला हामीबाट टाढा हुन सक्छिन् ।’

जेलमा रहँदा मोहम्मदीको तौल २० केजी घटेको छ, बोल्न गाह्रो भइरहेको छ र पछिल्लो पक्राउ अघि भन्दा उनी चिनिनै नसकिने अवस्थामा पुगेकी छन् । उनका समर्थकहरू चाहन्छन् कि उनलाई उनको व्यक्तिगत चिकित्सक टोलीद्वारा उपचार गर्न तेहरान सारियोस्, तर उनलाई जान्जानबाट सारिने कुनै संकेत देखिएको छैन । मोहम्मदीका जुम्ल्याहा किशोर सन्तान र उनका श्रीमान पेरिसमा बस्छन् ।