वीरेन्द्रनगर : कर्णाली प्रदेशका नवनियुक्त मुख्यमन्त्री मंगलबहादुर शाहीले शपथ लिएका छन् । बुधबार प्रदेश प्रमुख यज्ञराज जोशीसमक्ष पद तथा गोपनीयताको शपथ ग्रहण गरेका हुन् । नेकपा संसदीय दलका नेता शाही मंगलबार एमालेको समर्थनमा नेपालको संविधानको धारा १६८ (२) बमोजिम मुख्यमन्त्री नियुक्त भएका थिए ।
४० सदस्यीय कर्णाली प्रदेश सभामा सभामुखबाहेक नेकपाका १४ र एमालेका ९ गरी २३ प्रदेशसभा सदस्यको समर्थन प्राप्त भएपछि प्रदेश प्रमुखले शाहीलाई मुख्यमन्त्री नियुक्त गरेका हुन् । केन्द्रमा नेकपा र एमालेबीच भएको तीनबुँदे राजनीतिक सहमतिअनुसार कर्णालीमा नयाँ सत्ता समीकरण बनेको हो ।
मुख्यमन्त्री शाही यसअघि कर्णाली प्रदेश सरकारमा भौतिक पूर्वाधार तथा सहरी विकासमन्त्रीको जिम्मेवारी सम्हालिसकेका अनुभवी नेता हुन् । सत्ता साझेदार नेकपा र एमालेबीच मन्त्रालयको भागबन्डा टुंगिन बाँकी रहेकाले बुधबार मुख्यमन्त्री शाहीले मात्रै शपथ ग्रहण गरेका छन् । मन्त्रालयको संख्या र जिम्मेवारीबारे दुवै दलबीच छलफल जारी रहेको र सहमति जुटेलगत्तै मन्त्रिपरिषद् विस्तार गरिने जनाइएको छ ।
शपथपछि मुख्यमन्त्री शाहीले प्रदेशमा राजनीतिक स्थायित्व कायम गर्दै सुशासन, विकास निर्माण, रोजगारी सिर्जना र सेवा प्रवाहलाई प्रभावकारी बनाउने प्रतिबद्धता जनाएका छन् । उनले सत्ता साझेदार दलहरूबीच सहकार्य र सहमतिका आधारमा सरकार सञ्चालन गर्दै कर्णालीको विकासलाई तीव्रता दिने बताए ।
प्रतिक्रिया दिनुहोस !
