भक्तपुर : भक्तपुरको चाँगुनारायण नगरपालिका–२ दुवाकोटस्थित बारुदखाना चोकमा खाना पकाउने ग्यासको कालोबजारी गरेको अभियोगमा एक ब्यापारी पक्राउ परेका छन् । पक्राउ पर्नेमा स्थानीय ब्यापारी तुलसीराम त्वयना रहेका प्रहरीले जनाएको छ ।
त्वयना किराना पसलको सञ्चालक रहेका उनले खाना पकाउने एलपी ग्याँस उपभोक्तालाई प्रतिसिलिण्डर ७ हजार रुपैयाँको दरले बिक्री बितरण गरेको अभियोग छ । विशेष सूचनाको आधारमा प्रहरी प्रभाग दुवाकोटबाट प्रहरी नायब निरीक्षक खिलबहादुर दुलालको नेतृत्वमा खटिएको प्रहरी टोलीले शनिबार बिहान ब्यापारी त्ययनालाई पक्राउ गरी अनुसन्धानका लागि जिल्ला प्रहरी बृत्त थिमिमा ल्याइएको बृत्तका प्रहरी निरीक्षक राजन थापाले बताएका छन् ।
उपभोक्ताले अनलाइनबाट भुक्तानी गरी ग्यास खरिद गर्ना साथ प्रहरीले उनलाई नियन्त्रणमा लिएको थियोे । प्रहरीले ३ थान भरिएको ग्यास सिलिन्डर समेत बरामद गरेको बताएको छ । पछिल्लो समय भक्तपुरमा पनि खाना पकाउने ग्यासको अभाव देखिएको छ र कतिपय ब्यापारीहरुले यही मौकामा कृत्रिम अभाव देखाइ कालोबजारी गर्ने गरेका उपभोक्ताहरुको गुनासो छ । प्रहरी प्रशासनले यसतर्फ थप निगरानी बढाउन पर्ने सामाजिक अभियन्ता प्रेमध्वज मोक्तान बताउँछन् । ‘प्रहरीले साना दोकानदारलाई मात्र होइन, ठुला ब्यवसायीलाई पनि निगरानी गर्नुपर्ने देखिन्छ’, उनले भने ।
प्रतिक्रिया दिनुहोस !
