नयाँ वैकल्पिक शक्तिमा व्यवस्थित सोचविचार, योजना र चिन्ता देखिएन : महासचिव पोखरेल

काठमाडौं : नेकपा (एमाले) का महासचिव शंकर पोखरेलले लोकप्रियतावाद, अराजकतावाद र अवसरवादको जगमा खडा भएका शक्तिहरूले देशका मूल समस्या समाधान गर्न नसक्ने बताएका छन्। 

एमाले तारकेश्वर नगर कमिटीले शनिबार काठमाडौंमा आयोजना गरेको कार्यक्रममा महासचिव पोखरेलले नेपाली राजनीतिमा लोकप्रियतावाद, अराजकतावाद र अवसरवादको जगमा खडा भएको वैकल्पिक शक्तिले देशका समस्याहरूलाई सम्बोधन र समाधान गर्न नसक्ने बताएका हुन्। 

उनले अहिलेको वैकल्पिक शक्तिबाट मुलुकको सार्वभौमसत्ता नै समाप्त हुने चुनौती समेत देखिएको उल्लेख गरे। महासचिव पोखरेलले नयाँ वैकल्पिक शक्तिमा व्यवस्थित सोच, विचार, योजना र चिन्ता नदेखिएकाले उनीहरू नेपाली राजनीतिमा लामो समय नटिक्ने दाबी गरे। 

यस्तो अवस्थामा असन्तुष्ट मतदातालाई स्वतः पुरानै पार्टीमा फर्काउनका लागि विगतका कमजोरीहरू लुकाउनुको सट्टा जनतामाझ गएर आफ्ना गल्ती–कमजोरी स्वीकार गर्ने र सच्चिने प्रतिबद्धता जनाउनुपर्ने उनले बताए।

त्यस्तै महासचिव पोखरेलले पार्टीलाई वैचारिक, राजनीतिक र संगठनात्मक रूपमा एकताबद्ध बनाउन, शुद्धीकरण, सुदृढीकरण र रूपान्तरण जरुरी रहेको बताए।

यसका लागि पार्टी पुनर्गठनको कार्ययोजना बनाउन गठन गरिएको कार्यदलले काम गरिरहेको उनको भनाइ छ। उनले जनताको बहुदलीय जनवादको आधारमा आफ्ना नीतिप्रति जनतालाई विश्वास जिताउने र जनताको चाहनाको सापेक्षतामा प्रस्तुत हुनुपर्ने धारणा राखे।