वाइडबडी किन्न २४ अर्ब जुट्यो
काठमाठौं : नेपाल वायुसेवा निगमको दुईवटा वाइडबडी विमान भित्र्याउने योजना पूरा हुने भएको छ । निगमले विमान खरिद गर्न आवश्यक २४ अर्ब रुपैयाँ जुटाएको छ । कर्मचारी सञ्चय कोष र नेपाल नागरिक लगानी कोषले विमान खरिद गर्न २४ अर्ब रुपैयाँ ऋण उपलब्ध गराउने सम्झौता गरेका छन् ।
नेपाल सरकारको जमानतमा आइतबार र सोमबार भएको ऋण सम्झौताअनुसार सञ्चय कोष र लगानी कोषले १२÷१२ अर्ब रुपैयाँ उपलब्ध गराउने भएका हुन् । निगमले दुवै संस्थाबाट नौ प्रतिशत ब्याजदरमा १५ वर्षका लागि ऋण लिने गरी सम्झौता गरेको हो । वार्षिक ब्याजदर समायोजन गर्ने गरी ऋणदातालाई वार्षिक चार किस्ताको दरले रकम बुझाउने गरेर ऋण सम्झौतापत्रमा हस्ताक्षर भएको निगमका महाप्रबन्धक सुगतरत्न कंसाकारले बताउनुभयो । आइतबार सञ्चय कोष र सोमबार नागरिक लगानी कोषसँग ऋण सम्झौता भएको हो।
कर्मचारी सञ्चय कोष र नेपाल नागरिक लगानी कोषले विमान खरिद गर्न २४ अर्ब रुपैयाँ ऋण उपलब्ध गराउने सम्झौता गरेका छन्।
नागरिक लगानी कोषका कार्यकारी निर्देशक रामकृष्ण पोखरेल र निगमका महाप्रबन्धक कंसाकारले १२ अर्बको ऋण सम्झौतापत्रमा हस्ताक्षर गरेका छन् । दुवै संस्थाबाट आधाआधा रकम लिएर यही साताभित्र जहाज खरिदका लागि आवश्यक रकमको ३५ प्रतिशत अर्थात् आठ अर्ब रुपैयाँ पठाउने कंसाकारले जानकारी दिनुभयो । वैशाखको पहिलो साता नै नेवानिले लिने ऋणको सरकार जमानत बस्ने निर्णय भए पनि प्राविधिक कारणले ऋण सम्झौता हुन सकेको थिए । निगमले अमेरिकन लिजिङ कम्पनी एएआरसँग चैत २५ गते दुईवटा जहाज खरिद सम्झौता गरेको थियो । सम्झौता भएको एक महिनाभित्रै पहिलो किस्ता बापतको रकम पठाउने सहमति भए पनि ऋण लिन समयलाग्दा ढिलो भएको कंसाकारले बताउनुभयो ।
पहिलो किस्ता बापत रकम पठाउन केही ढिला हुँदा जहाज आउने समय पनि एक महिना जति ढिलो हुने भएको छ । खरिद सम्झौतामा सन् २०१५ को अप्रिलमा पहिलो जहाज र मेमा दोस्रो जहाज नेपाल आइपुग्ने उल्लेख छ । एएआर कर्पोरेसनसँग प्रतिथान १० करोड ४८ लाख अमेरिकी डलरका दरले दुईवटा वाइड बडी जहाज खरिद गर्ने प्रस्ताव निगमको सञ्चालक बोर्डले माघमै अनुमोदन गरेको थियो । सम्झौताअुनसार दुई जहाजको मूल्य २० करोड ९६ लाख अमेरिकी डलर (२१ अर्ब ५८ करोड ८८ लाख रुपैयाँ) पर्नेछ । अनुमोदन लगतै निगमले प्रारम्भिक सम्झौतापछि अमेरिकन कम्पनी एएआरलाई पौने ११ करोड रुपैयाँ बैना समेत पठाइसकेको छ । निगमले खरिद गर्ने जहाजका १६ वटा बिजनेस क्लास सिटसहित २८० सिट रहनेछ । निगमले दुईथान वाइड बडी ल्याएर लामो दुरी गन्तव्यमा सिधा उडान गर्ने योजना बनाएसकेको छ ।
निगमले युरोप र अमेरिकामा पनि सिधा उडान गर्ने योजना बनाएको छ । यसैगरी साउदी अरबको दमाम र अस्ट्रेलियाको सिड्नी उडान गर्ने योजना पनि निगमको छ । निगमले खरिद गर्ने वाइड बडी जहाजले एकतर्फी सिधा ९ देखि १० घन्टासम्मको उडान गर्न सक्छ ।दुई जहाज थपिएपछि निगमसँग अन्तर्राष्ट्रिय उडानका लागि पाँचवटा जहाज हुनेछन् । हाल निगमले एक बोइङ ७५७-२०० र दुई न्यारो बडी जहाजमार्फत आठ गन्तव्यमा उडान भरिरहेको छ । निगमले बोइङ मर्मतका लागि भन्दै जहाज भाडामा लिने प्रक्रिया पनि सुरु गरेको छ ।
यसैगरी निगमलाई विश्व बजारमा चर्चित गराउन र व्यवस्थापन सुधार गर्दै नाफाका लैजान रणनितिक साझेदार भित्र्याउने तयारी गरिएको छ । निगमको रणनीतिक साझेदारका रूपमा जर्मनको लुफ्थान्सा आउने तयारीमा छ।नेपालको पर्यटन क्षेत्रको सुधारमा राष्ट्रिय ध्वाजवाहका एयरलाइन्स नै महत्वपूर्ण हुने भन्दै जहाज खरिद गर्न लागेको कंसाकारले बताउनुभयो ।
उडान क्षेत्रको व्यवसायी योजनाकमा कोषले निगमलाई यो पहिलोपटक ऋण दिएको हो । यसमा पाँच लाख ७० हजारभन्दा बढी आम नागकिरको निक्षेप छ । यसबाट प्रत्यक्ष रूपमा आर्थिक समृद्धि, रोजगारी सिर्जना, पर्यटन क्षेत्रमा थप विकास पुग्ने आशाको साथ १२ अर्ब ऋण दिएको लगानीकोषका पोखरेलले जानकारी दिनुभयो ।
प्रतिक्रिया दिनुहोस !
